NIAWHAG si Msgr. Achilles Dakay, media liaison officer sa Cebu Archdioce nga ihunong na ang pagtawag sa All Saints’ Day ug All Souls’ Day nga kalag-kalag.

Matod pa ni Dakay, mosangpot lang kini sa sayop nga pagtuo nga dunay mga kalag nga naglaruy-laroy sa atong palibot.

Sakto si Msgr. Dakay nga way mga kalag nga naglaruy-laroy sa atong palibot.

Pero samtang nagsuwat ako niini, dunay bugnaw nga hangin nga nitayhop sa akong tingkoy.

***

Matampunsisok ang katawhan sa mga menteryohan matag kalag-kalag.

Yuna pa, ipahunong ra ba ni Msgr. Dakay ang pagtawag niini og kalag-kalag pero wa siya mosugyot kon unsay pulong nga ipuli kay ang kalag-kalag alang man sa duha ka adlaw.

Tingali adto na lang ta sa klaro nga adlaw sa mga santos ug adlaw sa mga minatay.

Bahala nag manuyo ang mga kalag unya sigihon og uyog ang atong katre inig katulog nato.

***

Bitaw, angayan nga tan-awon ang kahimtang sa atong mga sementeryo nga pangpubliko nga nagsapaw-sapaw ang mga lubong ug wa nay klaro nga agianan.

Sama sa sementeryo sa lungsod sa Liloan, kuyawan ko panahon sa kalag-kalag, aw adlaw sa mga santos ug sa adlaw sa mga minatay diay, kay makalakang ka sa daghang mga lubong.

Kon manuyo ang mga kalag sa mga lubong nga imong malakaran, delikado nga butangan og hubag ang imong lubot o pabuthon kanang duha ka lingin nga nagtabyog-tabyog.

Maayo gani kay madala rag palina. Naay daghang nagpa-aso sa daplin sa sementeryo.

***

Maghuot ang mga tawo sa mga sementeryo panahon sa kalag-kalag, magdagkot og mga kandila sa lubong sa ilang mga kaparyentehan ug mga minahal sa kinabuhi ug mohalad og mga buwak.

Apan dunay di ganahn sa samok busa di na lang sila moadto sa mga sementeryo. Adto na lang sa ilang mga panimalay.

Total, ginaingon bitaw kon di ka mobisita sa lubong sa imong mga kaliwat ug mga minahal sa kinabuhi, sila man maoy mobisita nimo labi na kon mingaw ug nag-inusara ka lang sa inyong balay.

***

Duha ka mga menor de edad nga nangitag kaka didto sa Barangay Cubacob, dakbayan sa Mandaue napalgan na lang nga patay na.

Ang ilang mga panit naputos sa garas-garas ug mga samad agi sa bala sa pusil.

Laing duha ka mga kalag nga hayan magkondenado kon di kahatagan og hustisya ang ilang kamatayon.