GENERAL SANTOS CITY - Misaka na sa upat ka tawo ang kompirmadong namatay tungod sa nahitabong diarrhea outbreak sa walo ka mga barangay sa Alabel, Sarangani Province.
Subay sa pinakaulahing gipagulang medical bulletin sa Municipal Health Office sa Alabel, misaka na ngadto sa 408 ang kinatibuk-ang naigo sa diarrhea hinungdan nga gideklara niadtong milabay'ng semana ang munisipyo ang diarrhea outbreak.
Matud pa ni Dr. Honorato Fabio sa Municipal Health Office (MHO) nga gawas sa pagdeklara na nga outbreak, gipailawom na usab ang mga barangay sa state of calamity aron magamit na ang 5-percent calamity fund sa munisipyo alang sa mga biktima sa diarrhea.
Subay sa taho sa MHO nga usa ka 13 anyos ang ulahing namatay sa diarrhea ug walo pa ang gitambalan nga nagagikan sa Spring, Alabel.
Sa Barangay Pag-asa, misaka na usab sa 303 ang natalang kaso samtang sa Barangay Bagacay dunay usa ang namatay nga nag-edad og 9 anyos.
Sa Barangay Kawas, dunay duha ang namatay usa niini giilang si Baby Emmanuel, 9 ka bulan, ug Rodelio Obando, 52. Samtang dunay natalang 97 ka kaso.
Sa pagkakaron, gipulong na ni Sarangani Governor Steve Chiongbian Solon ang mga lokal nga opisyal sa pito ka munisipyo sa Sarangani aron ipaalerto tungod sa paspas nga pagtaas sa kaso sa diarrhea, dala ang pagmando sa Provincial Health Office nga ayudahan ang mga barangay nga apektado niini.(Emir C. Bariquit)