USA ka kagawad sa Barangay Pasig, Kiblawan, Davao del Sur kinsa bag-o pang mihural sa katungdanan ug lain pang lima ka tawo ang nasamdan sa dihang gipamusil kagahapon sa kaadlawon.
Sumala pa nga mitambong ang mga biktima sa gihimong disko sa gymnasium sa maong dapit sa dihang nahitabo ang insidente ala 1:00 sa sayong kaadlawon.
Mga biktima giila nga sila Barangay Kagawad Benjamin Montejo, 46; Rolando Dayagdal ug Cherry Mae Gallardo, pulos lumolupyo sa Barangay Pasig.
Apil nga naigo sab ang mga dayo nga sila si Joey Alvior ug Larry Salutan, kinsa taga Barangay Balasiao, ug Teofilo Biñan nga nagpuyo sa Barangay Dapok, Kiblawan.
Gikanayon ni PO3 Allan Dave Parantar nga usa ka Thanksgiving Disco Party ang gihimo sanglit molingkod na ang mga napiling opisyal sa barangay karong Disyembre 1.
Sumala ni Parantar nga samtang lingaw nga nagsayaw ang mga tawo, kalit lang milanog ang masipang mga buto sa armas gikan sa mga armadong suspek hinungdan nga nangaigo ang mga biktima sa nagkadaiyang bahin sa ilang lawas.
Gibutyag ni Parantar nga base sa mga nakasaksi, giingong usa ka Julito Benlot, kinsa taga Barangay Bacaca, usa ka alyas Momo ug si Barangay Kagawad alyas Tata Lopez, kinsa pulos taga Barangay Litus, maoy gitudlong suspek sa pagpabuto sa ilang mga armas niadtong higayona.
Ang mga biktima gipangdala sa Gregorio Matas District Hospital apan gimando gilayon ang paghatod kanila didto sa Davao del Sur Provincial Hospital.
Di pa masuta sa kapulisan ang motibo sa hitabo mao nga naningkamot nga masikop ang mga suspek aron makuhaan og pamahayag ug imbestigahan sa maong hitabo.
Di pa sab makasulti ang kapulisan kon duna bay kalambigitan ang politika sa hitabo. (Orlando B. Dinoy)