DI DSAYON ang pagbuhi og agila. Mao ni ang akong nakat-onan gikan ni Giovannie Romarate ang manager sa Cebu City Zoo. Gawas nga tandugon kaayo ang iyang panglawas dako pa gyud ang maintenance sa pagkaon.
Mao ni kanunay nako nga ipahinumdom sa mga tawo nga nangandoy nga magbuhi ning maong matang sa langgam. Kay endangered specie man ang agila mao nga di sab mahimong sayunsayunon lang ni pagbuhi kay nagkinahanglan og pagtugot gikan sa Department of Environment and Natural Rersources (DENR) kadtong interesado niini.
Mao nga sa dihang gitawgan ko sa akong agaw Tet mahitungod sa usa ka serpent eagle nga mahimo nakong buhi-on, dali sab nakong gitawgan si Giovanni og sa way duha duha ako siyang giingnan nga ang agila nga para ako, adto na sa zoo magpabuhi.
Niadtong Sabado nakahigayon ko og bisita sa Cebu City Zoo og subli nakong nahimamat ang agila nga puerte nang piskaya og lawas. Ang bali niya nga pako medyo naulian na. Sa laktod nabalik na ang iyang naandan nga porma nga mapasigarbohon kaayo.
Ang mga bisita sa zoo lingaw kaayo nga nagpahulagway sa serpent eagle. Kung sa balay pa nako ni gitipigan, ang ako ra nga pamilya ang malingaw.
Mao nga kamong naghunahuna pagbuhi ning maong matang sa langgam ug sa uban pang endangered specie hunahunaa ninyo sa makadaghan kong masustinihan ba ninyo ang iyang kalagsik, basin himatyon na nang inyong gitagoan diha.
Tawgi si Giovanni og ipa-rescue kanang inyong binuhi.
RUTA
Nahisgutan namo og usab ni Giovanni ang kahigayonan nga dunay jeep nga magruta sa zoo diha sa Camp Marina. Ako siyang giingnan nga ang kitaon sa zoo karon mahimo triplihon pa kong duna nay klarong masakyan kadtong gustong mobisita sa zoo.
Busa pinaagi kang Citom Chairman Sylvan Jakosalem sayon ra kaayo ning sulbaron. Travel line og franchise ray gikinahanglan alang ning maong mga jeep. Gawas nga mahimong sayon ang pagbiyahe padung sa zoo ang mga molopyo duol sa zoo makapahimulos sab.
Siguro sila si Konsehal Nida Cabrera og Konsehal Bob Cabarrubias nga nagsuporta kanunay ni Giovanni, mohimo sa unang lakang. Mas nindot kong mahitabo kana sa wa pay Pasko o ba kaha sa wa pay Sinulog.
PNP
Nlabisita ko niadtong Beyernes sa Brangay Gaas, Balamban diin nahimutang ang Public Safety College Annex sa PNP.
Akong nahimamat ang mga training instructors og ang dul-an sa 500 ka recruits nga nagsugod na og pasingot sa mabugnaw nga dapit.
Malipayon nakong ipahibalo sa kabanay sa recruits, nga maayo ang ilang kahimtang didto bisan kong nag adjust pa sila sa kabugnaw sa dapit.
Angay sab mong malipay kay gipasaligan ko sa kadagkuan didto bisan kong estrikto sila sa pasingot dili mahitabo nga moabot sila sa punto nga ipailawom sa hazing ang mga kadite. Sa ato pa, gidili ang hazing didto ug mao ni nindot nga balita alang sa mga mabalak-on nga pamilya ning maong recruits.