Albor: Napid-ok nga paglaom

WALA pay tubag gikan sa LTFRB ang petisyon sa grupo sa mga drayber ug operator sa PUJ kabahin sa pagpangayog P1.50 nga usbaw aron mahimong P8 ang minimum nga pletihan.

Paglaom kini sa mga drayber ug operator apan bukog sa tutonlan sa mga sumasakayng publiko. Apan nalantawan nga daghan gihapon ang mosakay sa mga PUJ kay sugod karong Enero 15, usbawan ang flag-down sa taxi gikan sa P30 ngadto sa P40.

* * *

Napid-ok nga paglaom sa mga tricycle ug trisikad drivers sa Mandaue ug ubang dapit sa Metro Cebu kay sugod karong tuiga gidid-an na sila sa pagbiyahe sa mga dagkong kadalanan o highway aron paglikay sa disgrasya ug kahuot sa trapiko. Ang pagkunhod sa ilang kinitaan maoy ilang sinugatan ning bag-ong tuig.

PINAHITAY SA POLITIKA

Mga tinun-an sa Mandaue City College naangin sa pinahitay sa politika. Natukod ang maong kolehiyo panahon ni kanhi mayor ug karon Board Member Thadeo Ouano. Apan gipasirhan ubos sa administrasyon karon ni Mayor Jonas Cortes ug nagtukod og laing kolehiyo. Atol sa accreditation seminar didto sa University of Makati, si Dr. Patricia Licuanan, Ched chairman, nagkanayon nga awang siya sa kasayuran mahitungod sa background sa duha ka City College sa Mandaue. Samtang si Dr. Patriarca, president sa Association of Local Colleges and Universities Commission on Accreditation (ACLU-COA) mitakda og tigom uban ni Dr. Paulus Cañete, president sa nag-una nga Mandaue City College. Tungod sa nagsungay nga baruganan sa politika malagmit gilimong-limong sa pamunuan karon sa Mandaue ngadto sa mga Commissioner sa Ched hinungdan sa pagpahamtang og closure order. Nunot niini, si Dr. Cañete mi-file og formal pleading nga nagkuwestyon sa pagsira sa maong kolehiyo. Busa, maniksik pa kita sa mga posibilidad unsay sunod nga kalamboan.

DILI NA MAYOR

Sakto baya ang bul-og sa reaksyon sa kadaghanan nga misaway sa pagsalga o pag-apil-apil ni kongresista Tomas Osmeña sa pagpadagan ni Mayor Mike Rama sa siyudad sa Sugbo. Tinuod bitaw kay mahulog og unethical kay dili naman siya mayor. Sa iyang gihimo nagplastada siya sa iyang power and dictatorial tendency ngadto sa iyang mga alipores sa partido. Basin ang pag-usab ni Tomas kabahin ug tipik sa iyang new years resolution.

HAWIRAN ANG PAGLAOM

Daw tuldok ra sa dagom ang kaalam sa tawo kon itandi sa kahalapad sa kalaworan sa kaalam sa Ginoo nga dili matugkad sa pangisip sa tawo. Mao kini ang pagtulon-an nga dili nato kwestyonon ang gahom sa Ginoo tungod kay wala tay nadawat nga regalo sa milabayng pasko ug bag-ong tuig. Nahinumdom ko sa Obispo ug bata:

OBISPO: “Dong, kagamay sa lungag gikan sa gikob-kob nimong balas sa baybayon ug kadako sa lawod sa dagat nga imong gikabo ug gibobo sa lungag”.

BATA: “Sama bitaw nimo, Sir, imo gyong tugkaron ang kalawom sa pagtuo nga unay Amahan, Anak ug Espiritu Santo”.

Namalandong ang Obispo sa pagkalantip sa linghod nga salabotan sa maong bata nga naglarawan sa kaligdong ug naghambin sa kamatuoran ang pinulongan. Nasayran nalang nga ang maong bata usa diay ka Anghel. Busa, atong dawaton ang bisag unsang ihatag sa Ginoo. Hawiran ta ang paglaom ug kalinaw pinaagi sa pagsandig ngadto kaniya sa atong kinabuhi ug kapalaran ning tuiga sa mga koneho kon rabbit. Bintaha diay kay suwerte ug igmat ang maong mananap.

csa_1156@yahoo.com; cell #: 0905-250-4643

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph