MGA rebeldeng New People's Army kinsa nagpakaaron-ingnon nga mga sakop sa militar nangilog og duha ka trak ug duha ka motorsiklo alas 6:30 sa buntag niadtong Lunes didto sa probinsiya sa Cotabato.
Gisulti ni Colonel Prudencio Asto, hepe sa 6th Infantry Division nga nag-checkpoint ang mga rebelde didto sa Barangay Greenhills, President Roxas sa maong probinsiya ug nagsul-ob og uniporme sa mga sundalo nga gipangulohan ni Cornelio Bangkas alyas Kumander Ponyong sa Front Committee 53.
Sumala pa nga ilang giilog ang duha ka mga mini dumptruck nga gipanag-iyahan ni Antipas Municipal Kagawad Arlan Cadungon ug duha ka motorsiklo nga gimaneho nila Mark Pi¤ol ug Jeriel Navarra, mga empleyado sa Sumifru Philippines Corporation.
Gidis-armahan sab sa mga rebelde ang usa ka pulis nga si PO3 Rey Penaloza ug gikuha ang iyang armas nga 9mm pistol. Hinuon, wala sila pasipad-i sa mga rebelde.
Mga nahisgutang sakyanan maoy gigamit sa mga rebelde atol sa ilang pagsibat ngadto sa wala matino nga dapit.
Gikanayon ni Asto nga milusad gilayon og operasyon ang 57th Infantry Battalion sa Philippine Army batok sa mga rebelde ubos sa kamandoan ni Colonel Benjamin Hao.
Nakaplagan sa mga sundalo ang giabandono nga duha ka mini-dumptruck ug 2 ka motorsiklo didto sa Sitio Mahayag, Barangay Basak, Magpet.
Padayon ang manhunt operation sa 57th IB batok sa grupo ni Kumander Ponyong sa tiilan sa Mount Apo nga gitumbok nga kampo sa mga rebelde. (EF)