PADAYON sa pagsaka ang ihap sa mga kabataan nga giabandona sa ilang mga ginikanan subay sa datus nga giyagyag sa usa ka personahe sa Department of Social Welfare and Development (DSWD).
Atol sa forum kalabot Adoption Consciousness Week kagahapon sa DSWD office, gibutyag ni Sheryl Ann R. Dumalogdog, DSWD sa Davao Region focal person on adoption nga matag tuig dunay usbaw sa ihap sa mga kabataan nga ginapasagop matag tuig.
"Meron talagang increase, so far anaa ang 30-40 percent nga increase. Kadto pa lamang ng na-monitor namo."
Sa kasamtangan gisaulog sa ahensiya ang Adoption Consciousness Week diin uban sab niinin ang temang “Bata ay Huwag Abandonahin, Legal na Pagpapa-ampon ang Gawin.”
Sa pagbukas sa kalihukan nagmuntag og adoption desk ang DSWD didto sa SM City, Ecoland aron maoy motubag sa mga pangutana kalabot adoption.
Ni Dumalogdog nga gikampanya nila ang adoption aron sab mahatagan sa maayong alternatibo ang pag-atiman sa mga kabataan nga gipasagdan sa ilang mga ginikanan.
Dugang sa focal person sa adoption nga sa tuig 2010 dunay 600 ka petitioners, sila mga langyaw nga mi-apply aron maka-adopt og bata dinhi.
"Majority sa mga naga-adopt mga foreigners man, kadtong mga wala maka-anak and gusto makumpleto ang ilang pamilya. Every year naay 15-20 percent adoptive parents ang naga-apply, mamasin nga maaprubahan ang ilang pagsagop," sumala ni Dumalogdog.
Mga kabataan nga giabandona sa ilang mga ginikanan anaa sa kustodiya sa
DSWD Children Center.
"Duna tay duha ka classifications, ang abandon ug surrender. Sa surrender anaay 57 ka mga bata ang gihatag mismo sa ilang ginikanan, samtang sa abandon mga 52 ka bata. So dili ana kalayo ang ilang number. Kadtong mga abandon mao ng mga bata nga ginabilin sa parking lots, hospitals, tapos among gina-rescue, gina-house nato."
Sumala pa nga luyo sa DSWD anaa sab ang mga child-care agency nga accredited sa DSWD nga moatiman sa mga kabataan.
Usa ang magtiayong Mona Amorsen ug Benny Willemces Dalberg sa mga langyaw nga nakabaton og anak human misagop subay sa programa sa DSWD.
Ang duha nagpuyo didto sa Denmark, mianhi sa dakbayan aron mangita og bata nga mamahimo nilang masagop human nga pakyas silang makabaton og anak.
"We are so happy, so excited when we first saw and bring Thea in Denmark. My family is very glad to see her. Now that's she’s 12 years old, she knows she's adoptive, we never hide anything from her," ni Mona nga mohatag sa iyang testimonya atol sa tigum.
Aminado sab si Ester Acebedo-Versoza, Regional Director sa DSWD nga di sayon ang proseso sa adoption.
"It's a very long process but it's very significant for the parent and the child who longed to have a family," niya pa. (ROG)