ANG Sun.Star Davao SuperBalita nagpasalamat sa kahigayonan nga nakabaton kita og opisyal nga nagpakabana sa katungod sa kababayen-an nga mao si Konsehal Leah Librado.
Ang maong pinangga nga konsehal kanunay naglantaw sa kaayuhan sa kababayen-an nga sagad biktima sa mapanamastamason nga katilingban.
Sa mga panahon nga nayatakan ang katungod sa kababayen-an, iyang ipasibaw dayon ang ilang mga mulo pinaagi sa paggamit sa privilege hour sa regular session sa konseho.
Niadtong Martes, tungod kay nakadawat siya sa report sa Integrated Gender and Development Division (IGDD) bahin sa ilang nasayran nga dunay onse ka mga mantalaan (local ug national tabloids) nga nagpatik og hilas nga istorya ug hulagway, mipadayag ang maong konsehal sa iyang privilege speech.
Ang maong privilege speech nagkanayon nga nakalapas ang mga publishers sa tabloid sa Women Development Code of Davao City.
Tungod kay nakalapas man lagi, siya nanawagan sa mga law enforcement agencies nga sakmiton, silotan ug kanselahon ang ilang mga business permits, usa na dinhi ang SuperBalita.
Ang pahayag sa konsehal nabalita dayon sa mga mantalaan, radyo ug telebisyon. Ang GMA Network maoy unang mikuha sa habig sa SuperBalita.
Human miguwa ang balita, dunay mga abogado ug prosecutor nga nanawag sa SuperBalita kinsa nagkanayon nga kanunay silang nagbasa sa atong mantalaan ug ilang nasuta nga di hilas ang SuperBalita.
Bisan gani ang mga magsisibya sa radyo nagsulti nga di hilas ang atong mantalaan. Silang tanan nakasaway sa atong sa konsehal sa ilang mga programa. Ila kadtong opinyon ug wa kitay labot.
Alang sa atong kasayuran, ang editor-in-chief ug general manager sa SuperBalita pulos mga babaye, ug di gayud sila motugot nga bugal-bugalan ang kababayen-an.
Kung dunay hulagway sa artista ang SuperBalita, apan gisiguro namo nga desente ang hitsura.
Nalimot siguro ang atong buotan nga konsehal sa mga panahon nga nahimo niyang instrumento ang SuperBalita sa pagmantala sa iyang adbokasiya ug programa alang sa kababayen-an.
Wa sab siguro niya nakita ang mga mahinungdanong section sama sa Dangpanan, Tambagi Ko Noy Tikyo, Health Tips, Negusyo, Matud Nila, Kung sa Ako Lang nga naghisgot sa kaayuhan sa katawhan.
Kung duna may angay gukdon, kadtong tinuod nga nagpatik sa hilas nga istorya nga anaa lamang sa mga bangketa mabasa, di kining Mantalaan sa tibuok pamilya!