KAKUWANG sa income sa isla sa Olango maoy bugtong babag nga mabuwang kini sa dakbayan sa Lapu-Lapu ug mahimong bag-ong lungsod sa lalawigan.
Si Mayor Paz Radaza nibutyag nga usa sa gikonsiderar sa iyang administrasyon mao ang daan nang plano nga paghimong lungsod sa isla sa Olango.
Nasayran ang isla sa Olango gilangbukan sa onse ka mga barangay nga kabahin sa kinatibuk-ang 30 ka nga barangay sa Lapu-Lapu ug nahimotang sa pipila ka milya nga silangan sa dakbayan.
Si Mayor Radaza niingon nga kaniadto ra kini nga taho panahon sa iyang bana nga kanhi mayor sa Lapu-Lapu ug karon Kongresista Arturo Radaza sa bugtong distrito sa dakbayan.
Matod sa mayor nga kon ang gidak-on lang ang hisgutan ug gidaghanon sa mga tawo, mopasar ang isla sa Olango.
Apan ang problema sa ilang income tungod kay giangkon sa mayor nga gamay pa gayod kaayo ug di pa makabarug sa ilang kaugalingon.
"Maluoy man ug atong buhian unya dili pa sila makabarog kay ang income gamay kaayo makonsensya man pud ta, ” asoy ni Mayor Radaza.
Hinungdan nga ubos karon sa iyang administrayon ug sa termino karon ni Kongresista Radaza, ang usa sa ilang sentro sa programa mao ang pagpalambo sa isla sa Olango pinaagi sa pagpalapad ug pagpasemento sa tanang karsada sa lugar aron modako ang income sa isla.
Pinaagi sa maayong inprastraktura, mas modaghan ang mobubo og negusyo sa isla nga usa sa mga dapit nga paborito nga suroyan sa mga turista labi na sa whale ug migratory bird watching.
Lakip sa pagpatukod og mga tunghaan ug livelihood projects sa mga lumolupyo sa isla.
Ang baruganan ni Mayor Radaza gidasunan sa duha ka mga konsehal nga nagbase sa maong isla nga sila si Konsehal Junrey Gestopa ug Konsehal Roque Wagwag.
Matod sa duha ka mga konsehal, damgo usab nila nga mahimong lungsod ang isla sa Olango apan dili pa karon ang tukmang panahon sa pagbuwag sa Lapu-Lapu. (DRT)