GIDAYEG sa mga delegado gikan sa United Nations Philippine White Helmets Investment and Training Mission ang kahusay ug kalinaw sa siyudad sa Davao.
Mga delegado unang mibisita didto sa Davao City Public Safety Command Center (DCPSCC) diin gihimo ang briefing nga gipangunahan ni DCPSCC chief Magno Adalin, City Planning and Development Office (CPDO) officer-in-charge Robert Alabado III ug City Tourism Office head Jason Magnaye.
Ang tulo ka mga opisyal sa siyudad mipasabot sa mga delegado sa mga butang gihimo sa dakbayan bahin sa kahusay ug kalinaw sa siyudad sa Davao.
Nakadayeg sila sa modernong kahimanan sa DCPSCC sama sa pag-monitor sa mga sakyanan nga magdagan sa tanang kadalanan sa siyudad pinaagi sa Closed Circuit Television (CCTV) camera.
Didto gipakita nga mamahimong masayran ang dapit nga nahimutangan mga sakyanan nga posibleng sakyan sa mga kriminal.
Masakpan sab ang mga sakyanan nga nakalapas sa balaod trapiko pinaagi sa record sa CCTV camera nga gimuntar didto didto sa DCPSCC.
Ang monitoring gihimo sa maong buhatan 24 oras aron masiguro nga masakpan ang mga kriminal.
Sa power point presentation ni Alabado, mga delegado nakadayeg gayud sa siyudad sanglit ilang napamatud-an nga sayop ang pagtuo sa kadaghanan nga di maayo ang kahusay ug kalinaw sa dakbayan.
"One of the things that I discovered in the presentation was the peace and order. I was impressed of what you are doing," ni Kike Lawal, UNIDSR programme officer for Business Partnership (Geneva) nga nahinabi sa mga tigbalita didto sa DCPSCC.
Si Lawal nagkanayon nga iyang nasabtan ang tanan nga paningkamot sa siyudad tungod kay buot sa lokal nga kagamhanan nga makakuha og dugang mamumuhonan ug turista nga mosud sa siyudad.
"I understand the fact that if you want to get more foreign investment and more tourist into Davao, peace and order is the key. And, I think what you are doing right now is very impressive than other developing cities," pahayag ni Lawal.
Si Lawal nagkanayon nga iyang pahibaluon ang iyang labaw sa United Nations bahin sa ilang naobserbahan dinhi sa siyudad sa Davao nga kanunay maangin sa pagtuo sa ubang kanasuran nga gubot sama sa dautang imahe sa Mindanao.
"Ang ilang mission karon is to look a place or local government unit nga ilang mabutangan sa ilang programa. Ang atong gihimo karon is just an exploratory talks with them, but tomorrow we have to impress them during the pormal meeting," ni Alabado dihang gipangutana human sa briefing.
Ang maong opisyal nagkanayon nga andam na ang siyudad sa Davao sa bisan unsang negusyante nga mobubo og kapital sama sa gisaad sa mga delegado nga gilangkuban ni Lawal.
"Our infrastructures are very much prepared for the investors. Kining ilang mission karon mao ang pagtan-aw sa problema bahin sa mga disasters aron makaimbita sila mga investors nga mamuhunan sa disaster risk reduction facilities," pahayag ni Alabado. (Alger Dura)