GIBUTYAG ni Department of Social Welfare and Development (DSWD) Socckssargen Director Bai Zorahayda Taha nga kumpyansa siya sa kredibilidad sa ahensya sa pagpatuman sa mga serbisyo alang sa mga kabus taliwala sa mga isyu mas maayong ibalhin sa lokal nga kagamhanan sa tibuok nasud ang pagpatuman sa Pantawid Pamilyang Pilipino Program o "4Ps".
Sa gihimong tigom sa mga sakop sa media didto sa Central Mindanao, gipahayag ni Taha nga girespeto niya ang opinyon sa mga kritiko, apan kaya sa maong ahensiya ang pagpatuman sa maong programa.
"Ang DSWD ang namahimong lead agency sa 4Ps kay kami lang ang may mando nga motabang sa kabos," pahayag ni Taha.
Giklaro ni Taha nga dunay ikatabang ang lokal nga kagamhanan sa implementasyon sa 4Ps aron mahapsay ang pagpatuman sa maong programa.
Siya nagkanayon nga ang mayor sa nagkadaiyang munisipyo ug siyudad nga benepisyaryo sa programa mao ang chairman sa Municipal Action Committee (MAC) nga maoy makahatag og katin-awan ug kasayuran bahin sa 4Ps.
Ang maong opisyal dugang nagbutyag nga di angay sukdon ang ang integridad sa ahensiya sanglit napamatud-an na kini sa World Health Organization (WHO).
Ang WHO nagtuo nga masaligan ug tinud-anay gayud ang implementasyon sa mga programa sa ahensiya alang sa mga kabos. (Edgardo Fuerzas)