DUMAGUETE CITY- Temporaryo unang gisira ang planta sa Fuel Ethanol human kini makadawat og reklamo gikan sa daghang mulopyo sa dakbayan sa Bais ug mga silinganang lungsod.
Sumala pa nga nag-operate ang planta nga way permit sa pag-discharge sa waste water niini lakip na sa ubang mga rekisitos ug mayor’s permit.
Ang planta nahimutang kini sa may Barangay, Tamisu dakbayan sa Bais.
Ang dakbayan nakasinati kinig fishkill sa miaging semana ug gidudahan nga ang hugaw nga gikan sa planta maoy hinungdan sa pagkamatay sa mga isda sa kadagatan.
Ang Fuel Ethanol ang gipanag-iya kini sa Universal Robina Corporation.
Ang Provincial Environment Management Unit (PEMU) ubos sa Environmental Management Bureau sa Central Visayas miisyu og notice of violation sa planta.
Si Loreto Rivac, provincial officer sa PEMU, nipahibawo ngadto sa buhatan sa DENR 7 labot sa sunodsunod nga nadawat nga reklamo gikan sa mga mulopyo sa dakbayan tungod sa kabaho nga ilang nahanggab ug gisundan sa pagkamatay sa mga isda nga sumala pa gikan sa planta.
Ang Fuel Ethanol Plant maka-produce kinig 30 milyones ka litros o 20,000 ka metriko tonelada nga ethanol fuel matag tuig.