DAGHAN na diayng warrant of arrest tungod sa kasong estafa si Jennifer Toreno, ang amo nga nigamit sa iyang katabang nga nakailad og P11 million gikan sa Australian National nga iyang na-uyab pinaagi sa internet.

Nasayran nga si Toreno, nagtago-tago na karon ug wala na magpakita sa iyang panimalay sa Maryville Subdivision sa Talamban.

Gipangita siya sa City Intelligence Branch (CIB) sa Cebu City Police Office ug Makati Police human ang Australianong si Cornelius Marinus Jansen nireklamo niini.

Si Jansen nailad dihang ang suspetsado iyang nauyab pinaagi sa internet ug gitabangan sa pag-proseso sa Australian visa.

Apan sa pagduaw niini dinhi sa Pilipinas wala kini niya igkita ug nadala pa ang iyang minilyon nga kwarta.

Si Chief Insp. Romeo Santander, hepe sa CIB, nga nahinabi sa Sun.Star Superbalita, mibutyag nga adunay duha ka warrant of arrest ang korte nga gi-isyu didto sa Bacolod City batok kang Toreno.

Gawas niini ilang nahuptan karon ang laing warrant of arrest sa duha ka kasong estafa batok kang Toreno nga gi-isyo ni judge Edito Enemecio sa Regional Trial Court Branch 25 sa Danao.

Nunut niini gi-awhag karon ni Santander kadtong uban pang mga tawo nga nabiktima ni Toreno, sa pagduaw diha sa ilang buhatan sa CIB sa CCPO alang sa dugang kasong mapasaka batok niini.

Kon kahinumduman, si Toreno, nigamit sa iyang katabang nga si Juliet Mangas Hermosilla, 24, dalaga taga Pulangyuta, dakbayan sa Danao, pinaagi sa paghatag niini’g ID nga usa ka Susan Soco sukad pa niadtong Enero.

Kini maoy gigamit aron mailad ang Australiano.

Si Hermosilla, miduso karon og affidavit batok sa iyang amo, ingon man ang kauban niining katabang nga si Everlyn Tundag, ug driver nga si Wennie Camay.