NADAWAT na ni Police Superintendent Alfredo Santillana, kanhi hepe sa lungsod sa Sta. Cruz, Davao del Sur ang mandong pagsuspende kaniya sud sa 60 ka adlaw.
Si Senior Police Officer 4 Erich Von Requilman sa Firearms and Explosive Division sa Davao del Sur Provincial Police Office (DDSPPO) nagsulti nga sugod karong adlawa, ipatuman sa rehiyonal nga buhatan sa Camp Catitipan ang pag-relieve kang Santillana.
Kasamtangan siyang ibalhin ilawom sa kamandoan sa Personnel Holding and Accounting Unit (PHAU) sa rehiyon, matud ni Requilman.
Kahinumdoman nga si Santillana miadto sa sabungan sa Barangay Astorga sa dihang hepe pa sa Sta. Cruz Police Station niadtong buwan sa Septyembre 2010.
Sigon sa mga nakasaksi, nagpabuto matud pa ang opisyal sa pulis sa dalang armas sa hantakan nga gialegar nga wa magbinayranay sa sugal.
Una nang gilimod sa opisyal nga nanugal siya sa sabong, apan miangkon nga nagpabuto siya sa armas human wa mipatuo ang mga sugarol sa hantak ug nanagan sa dihang gisulayan og dakop.
Si Santillana way madawat nga suweldo sud sa duha ka bulan nga suspensiyon. (Dondon Dinoy)
