DAVAO CITY -- Duha ka tawo ang patay samtang sobra pa sa tulo ang gipangita sa kasamtangan human nga giigo sa ipo-ipo ang usa ka lugar didto sa Compostela Valley, Huwebes sa gabii.

Subay sa report, nahitabo sab ang pagdahili sa yuta mga alas 8:30 sa gabii sa Sitio Matagdungan, Barangay Bukal sa Nabunturan.

Sigun ni Police Provincial Director Aaron Aquino nga ang mga namatay'ng biktima giila nga sila Pablo Tibay, 59; ug Cristine Berunguis, 4.

Ang patay'ng lawas sa mga biktima na-rekober na didto sa Manat River sa mga rescuers mga alas 6:00 sa buntag kagahapon.

Samtang padayon sab nga gipangita karon sa otoridad sila Mae Berunguis, 7; Rachel Berunguis, 6; ug Angel Berunguis, 9 ka bulan.

Ang magtiayon nga Berunguis, nga giilang sila Rico ug Maricel, nakaangkon og mga pangos sa lawas, gitambalan na karon sa balay tambalanan.

Subay sa report, usa ka ipo-ipo ang mikuso-kuso sa panimalay sa pamilyang Tibay ug Berunguis.

Sunod niini, nahitabo ang flashflood nga milubong og buhi sa pipila ka biktima.

Usa ka tulay sab sa lungsod sa Maco ug laing usa sa Barangay Tandic ang nahugno human maigo sa ipo-ipo ang lugar.

Nagpadayon ang rescue and retrieval operation sa kasamtangan. (Sun.Star SuperBalita Davao)