USA ka magtiayon ang midangat sa tambalanan human sila gipusil gikan naglingaw-lingaw sa videoke house alas 3:00 sa kaadlawon kagahapon didto sa didto sa Kilometro 12, Barangay Sasa, siyudad sa Davao.

Ang kapulisan nag-ila sa mga biktima mao sila Emersion Udtojan, 30, ug Mary Jane Rosas, 40, pulos nagpuyo sa Panacan Relocation, Barangay Panacan, ning siyudad.

Sila Emersion ug Mary Jane gikatahong mag-live in partner gitambalan karon sa Southern Philippines Medical Center (SPMC).

Base sa pasiunang imbestigasyon sa Sasa Police Station, mga biktima misud sa Lolita Macarambol Videoke House uban ang ilang mga silingan nga sila Richard Zeron, Romeo Apostol ug Michael Hista.

Giingon nga ang mga biktima nag-inom sa maong lugar, apan dihang nakahurot na sila og pipila ka botelya sa ilimnon nga makahubog, nakahukom silang mopauli sakay sa ilang multicab.

Samtang mipahiluna ang mga biktima sa multicab, daling miabot ang usa ka suspetsado nga nailhan sa pangalan nga Louie Insigne, hamtong ang pangidaron, kauban ang wa mailhi nga lalaki.

Si Insigne wa maglangan og panahon iyang gilanit ang wa matino nga kalibre sa armas dayon gition ngadto kang Suico, apan natapi ang armas hinungdan nga naigo si Udtojan.

Si Udtojan nakaangkon og samad sa iyang tuong kilid nga milapus sa wala hinungdan nga mitugpa siya sa tambalanan.

Wa pa makontento ang suspek, suma sa report, gibunalan pa ang ulo ni Mary Jane sa pul-an sa iyang armas nga miresulta sa pagkasamad iyang mata.

Tungod sa maong hitabo, nagkagubot ang maong dapit mao nga daling miikyas ang suspek aron di masikop sa mga morespondeng pulis.

Mga biktima gitambalan na sa mga doktor sa SPMC samtang ang suspek gipangita sa kapulisan aron sikupon, pasakaan og kasong frustrated murder sa korte. (AD)