TUNGOD sa pagsungag sa 10 wheeler truck sa depasaherong dyip, hikabsan sa kinabuhi ang duha ka mga tawo ug laing pito ang nangaangol alas 11:00 sa buntag niadtong Huwebes didto sa probinsiya sa Cotabato.
Mga nangamatay nailhan nga sila Ed Lucero ug si Elmar Pacite samtang ang naangol gidala gilayon sa Cotabato Provincial Hospital.
Nasayran gikan sa Cotabato Police Provincial Office nga mga biktima sakay sa usa ka depasaherong Lawin jeep nga dunay plaka numero LVH074 gikan sa Matalam apan pag-abot nila sa Barangay Tibao, M'lang, dunay mga pasahero nga mipara hinungdan nga nag-menor ang dyip. Apan wala mabantayi sa drayber sa dyip nga duna diay
nagsunod nga trak ug mibangga sa likod nga bahin.
Patay gilayon sila Lucero ug Pacite nga niadtong tungura nagkabit sa likod nga bahin sa dyip. Samtang ang laing pito ka mga tawong naangol dali nga gitabang sa mga sibilyan ug gidala sa nagkadaiyang balay tambalanan.
Sumala sa mga nakasaksi, nga kusog matud pa ang dagan sa trak, nga dunay plate number MTO 962, nga puno og uling ug dad-on unta didto sa siyudad sa Heneral Santos. Ang trak gipanag-iyahan sa usa ka Mohammad Salindab.
Boluntaryo nga mitahan didto sa M'lang Police Station ang drayber sa trak nga wala gibutyag ang pangalan gumikan sa iyang seguridad.
Hinuon, si Salindab nagsulti nga andam siyang motabang sa mga nahimong biktima
sa among aksidente.
Kapulisan padayon pang nagsusi sa maong hitabo. (EF)