DAAN pa lagi ko. Sa niagi nakong kolum akong nalakbitan nga maglisod gyud og sulod ang Phoenix sa PBA bisan pa man og interesado ug agresibo kini nga maoy mopalit sa prankisa sa Red Bull Barakos.

Kini tungod kay gidid-an man sa PBA Board ang Red Bull sa pagbaligya niini ngadto sa Phoenix. Sa napulo ka miyembro, upat ang mibabag niini. Pito ang gikinahanglan sa Barako aron kini maaprobahan.

Gumikan niini, mainat ang leave of absence sa Barakos ug kon di pa gyud sila makabalik karong tuiga, hayan siyam lang ka team ang makaduwa sunod conference.

Sa gikaingon ko na posibling dunay business interest ang pagbabag sa PBA board ngadto sa Phoenix nga mahimo kining bag-ong miyembro sa lega.

Ang pag-usab sa ngan sa San Miguel Beer ngadto sa Petron 100 Blaze maoy usa ka estratehiya aron di makasulod sa lega ang ilang kompetensiya nga Phoenix.

Take note, nga ang Presidente sa San Miguel Corporation mao si Ramon Ang kinsa mao usab ang usa sa mga tag-iya sa Petron.

Makahibulong man gud kay samtang nagsigi og pangumbinsi ang PBA og mga dagkong kompaniya nga moapil sa lega, nia no-oy interesado nga mosulod gibalibaran man nuon.

******

Alang sa katagbawan sa atong mga bumabasa nga mahiligon usab og sabong o derby, aduna diay idalit nga “Holy Week Special 3-wins” promo ang MSRC Cockpit sa Calajoan, Minglanilla karong Abril 17-24.

Kini maoy gipahibawo sa promoter nga si Wennie Geonzon kinsa mibutyag nga moabot ngadto sa P1 million ang premyo.

Ang kampiyon makabulsa og P850,000 samtang P100,000 sa handler ug P50,000 sa gaffer.

Isip usa sa mga kalihukan sa Sugat sa Minglanilla, ang pot money sa maong promo mokantidad lang og P1,500 ug dili lisod ang matching kay taparay lang.

Unya kon di matari-an anang adlawa, mahimong mobalik ra sa ubang adlaw basta sulod lang sa promo period.

Ako nahinumdom nga sa niaging tuig grabi ka alegre ang maong promo bisan pa man og P500,000 kapin lang ang premyo niadtong higayona mosamot na siguro karon.

Matod ni Geonzon alang niadtong interesado mahimong motawag lang niya sa 0905-3429095 o ka ha ni Carlito Reyes sa 0928-3490646.

Akong email add:

(junmigs0622@yahoo.com)