PULOS gipangdala sa balay tambalanan ang igsuon ug usa ka inahan human gitigbas sa anak ra usab niini niadtong Huwebes mga alas 8:00 sa gabii sa Danatag, lungsod sa Baungon, Bukidnon.

Gitumbok nga suspetsado si Alvin Dalinian kinsa giayo og tigbas ang igsuon nga mao si Raymund Dalininan, 20, ug giapil sa pagtigbas ang iyang inahan nga mao si Nonelia, 59, pulos residente sa susamang dapit.

Nahitabo ang insidente sulod mismo sa puloy-anan sa pamilya dihang miuli sa puloy-anan si Alvin nga apektado kayo og ilimnong makahubog.

Dihang nabikil sa igsuon kalit lang kining mikuha og sundang dayon deretsong gitigbas si Raymund hinungdan sa pagkaabkah sa likod ug naigo pa ang ulo niini.

Tungod sa kataranta ni Nonelia sa nahitabo sa iyang duha ka anak miaparta

kini apan giapil sa pagtigbas ni Alvin hinungdan naabhak usab ang ulo nga bahin niini.

Dihang nahimasamasan si Alvin kalit kining midagan ug wala masutan kung asa mipaingon ug gipangita pa ning panahona.

Ang mga biktima gidala sa duol nga balay tambalanan sa dapit apan kritikal ang kahimtang ni Raymund tungod kini ang mas nagrabehan hinungdan gisduso ang duha sa Northern Mindanao Medical Center (NMMC) ning siyudad sa Cagayan de Oro.

Sa pagsulat ning balita, kasamtangan pa nga giatiman sulod sa emergency room ang duha ka biktima samtang ang kapolisan sa Baungon Police Station gipangita na ang igsuon niiniin milakaw human sa hitabo. (Stephanie V. Berganio)