TULO ka mga lungsod sa Misamis Oriental ang gipangbahaan niadtong Huwebes mga alas 11:00 sa gabii tungod sa walay hunong nga pag-ulan.

Ang kusog nga bul-og sa tubig miresulta sa pagbaha sa lungsod sa Balingoan, Talisayan ug Medina, Misamis Oriental.

Si Sangguniang Panlalawigan (SP) Member Teddy Sabugaa, chairman sa Disaster Coordinating Council sa SP, miingon nga kumpiramdong gipangbahaan ang tulo ka barangay sa Balingoan nga mao ang Bauk-Bauk, Lapinig, ug San Alonzo.

Gani ang mga residente sa dapit nibakwit sa ilang tagsa-tagsa ka mga puloy-anan tungod kay misaka na sa 3 ka metros ang tubig baha.

Usa ka residente sa dapit niingon nga wala silay sapa apan kalit lang mibutho ang tubig ug misulod sa kabalayan nga nibanlas pa sa pipila ka mga puloy-anan, ug mga tinanom.

Apektado usab ang mga tindahan sa dapit tungod kay nanglutaw ang mga baligya.

Si Mayor Perlita Espero nibutyag sa usa ka interbyu sa radyo nga kini ang labing grabe nga danyos nga pagbaha sa ilang lugar. Nanghilak na ang mga

residente sa mga nangbasa nga mga gamit.

Nanawagan kini sa iyang mga residente nga alerto kanunay labina nga dili tiaw ang kalamidad nga nasinati sa iyang lungsod.

Samtang niapaw usab ang tubig sa Barangay Poblacion ug labing naapektuhan ang merkado nga taga tuhod na ang tubig sa lungsod sa Talisayan.

Samtang nakasinati usab sa pagbaha ang sakop Purok 4 nga bahin sa Barangay Tagbocboc sa lungsod sa Talisayan. Padayon pa nga gisuta ang nabahaan nga lugar sa lungsod sa Medina.

Gibutyag ni Sabugaa nga tungod sa walay undang nga ulan, nibuto ang buhawi nga miresulta sa pagbaha ug hangtod ning panahona nagpabilin pa ang tubig ug wala pa niubos labina nga padayon pa ang pag-ulan.

Gituohan nga magbilin og dako nga kadaut sa maong mga lungsod ang nahitabo.

Sa pagsulat ning balita, kasamtangan pa nga gi-monitor mismo ni Bise Gobernador Norris Babiera ang kahimtang sa mga nabahaan aron maandam ang gamayng tabang alang sa mga apektado.

Gi-advise usab ni Babiera sa mga katawhan nga kadtong anaa daplin sa mga suba mohinay-hinay na sa pagbakwit ug moadto sa luwas nga lugar. (Stephanie V. Berganio)