MISAAD ang sumosulbong nga si Dodie Boy Peñalosa Jr. nga iyang tumbahon si Roel Bacquiano sulod sa lima ka rounds karong gabii sa main event sa “Dugong Kampyon” boxing promotion sa Cebu City Sports Institute Arena sa Pasil, San Nicolas, Cebu City.

Human sa official weigh-in kagahapon sa Cebu City Sports Center, nag­kanayon si Dodie Boy Jr. nga ki­nahanglan gyud niyang makaposte og impresibong kadaugan hilabi na kay kini maoy labing unang moaway siya’g main event.

“Blessed kaayo ko kay sayo pa sa akong boxing career, nakaaway na ko og main event,” matod ni Dodie Boy Jr., kinsa adunay 3-0, 3KOs nga rekord.

“Paninguhaon nako nga ako si­yang tumbahon sa early rounds, seguro suds a five rounds. Kinahanglang impressive akong performance kay main event biya akong away.”

Ang amahan ni Dodie Boy Jr. nga si kanhi two-time world champion Dodie Boy Sr. nagkanayon nga masukod gyud ning awaya ang abilidad sa iyang anak.

“Nindot ning duwaa kay experience ang kontra ni Dodie kay 15 fights na man. Unya ingon sab siya (nga sakto siya’g training para ning awaya,” matod ni Dodie Boy Sr.

Si Dodie Jr. mitimbang og 122 lbs. samtang si Bacquiano mitimbang og 120 lbs.

Laing angayang atngan sa promosyon mao ang panag-away nila ni Romnick Magos batok Anthony Sabalde.

Magsangka sab sila si Rommel Banquerigo batok Serwin Caday, Nick Joy Bacalso batok Arnold Meralpez, Sonny Ka Tiandagho batok Rodel Wencislao ug Jo Marie Yuson batok Reymund Fermin.

Ang Cebu City Sports Commission nakigtambayayong sa Ren-Wil Promotions alang sa pagpahigayon sa promosyon.