MIKUYANAP karon pagmaayo ang mga nagkadaiyang herbal supplements unya mao ra bay gipasundayag ug gibandilyo sa publiko pinaagi sa telebisyon, radyo ug peryodiko nga “cure all” ang ilang produkto. Unya aron nga mahimo kining kumbinsido, mao dayu’y gamiton ang mga testimonya sa kintahay mga natambalan sa ilang mga ngilngig nga mga sakit sama sa kanser ug uban pang malisod na kaayong tambalan nga mga balatian aron mahurot gyud ang pagbilib sa katawhan nga moresulta ngadto sa kusog nga halin.

Ang nakaparat kay ang atong mga hingtungdang mga ahensya sa gobiyerno nga angayan untang manalipod sa panglawas sa katawhan ang nahimong inutil ning maong modus operandi kay igo ra mang gihatagan og konsuwelo de bobo ang katawhan pinaagi sa linya nga “no approved therapeutic claims”.

Apan klaro naman unta kaayo ang mga pagpangangkon sa halos imposibleng mga milagro nga epekto ning maong mga herbal supplements pero wa gyuy nakabadlong ning maong paghatag og sayup nga impormasyon. Aduna koy suod nga higala kaniadto nga adunay gihambin nga sakit diha sa iyang suso kay adunay mitubo nga hubag. Mahadlok nga moatubang sa doktor kay basin unya’g mapahibawo sa kaseryuso sa balatian.

Na impluwensiyahan sab sa sigeng pagtan-aw, pagpamati ug pagbasa sa mga advertisements.

Siya mitumar ning maong mga herbal-herbal nga niya pa “alternative treatment”. Pero sa dihang migrabe na gyud pagmaayo ang iyang natagamtamang sakit, napugos sa pagpahiling sa doctor unya diha na nadiskubrihi nga terminal na diay intawon ang iyang cancer of the breast.

May uban usab natong mga kaigsuonan ang gibiyaan pagdiretso ang ilang mga gimentenar nga tambal nga giresita sa ilang doctor kay maayo lagi kuno ang ilang nabatyagan nga epekto ning ilang pagtumar og herbal.

Sa medical science, adunay gitawag og placebo effect diin ang utok sa tawo nga nagtuo nga gihatagan siyag maayo nga klase sa tambal pero bisan og dili diay tinuod nga medisina ang gipatumar, ang usahay mo-alibyo gihapon ang gipamati kay ang utok nga maoy nagmandar sa lawas mao may nagkondisyon nga mamaayo na ang iyang kahimtang.

Wa pay medisina o supplement nga ikatambal sa tanang sakit sa tawo dinhi sa kalibutan.

Busa angayan ug matarong lang nga pakgangon na sa kagamhanan kining ilad nga giladlad sa atong atubangan kay gawas nga ang kuwarta sa mga kabus ang naapil sa pagkaanod, kini magkahulugan usab og pagkadisgrasya sa mga kinabuhi tungod sa sayop nga pagtuo.