NAGYANGO-YANGO ang mga abogado nga nisaksi sa presentasyon ni Sr. Supt. Pat Comendador ginamit ang power point labot sa kaso ni Ellah Joy Pique. Kini human sa gisang-at sa Task Force Ellah Joy ang kasong kidnapping with homicide didto sa piskaliya niadtong Huwebes. Si Comendador nga maoy nangulo sa task force niatubang sa media human sa pagpasaka sa kaso aron tubagon ang daghang pangutana sa mga reporter.
Sa wa pa ang mga pangutana gipang-apod-apod ang press release sa task force ug nisunod ang power point presentation. Way kabutangan sa ilang pagdayeg ang mga abogado nga nitambong sa hilabihan kahan-ay ug kadetalyado sa presentasyon. Sayon sabton kay kompleto sa hulagway sa mga tawo nga nalambigit sa kaso, mapa sa dapit ug karsada ang gihukad ni Comendador sa mga nanambong.
Mao nga pagkahuman sa presscon ako siyang gisultian asay maayo nga iyaha sab nga bansaybansayon ang ubang imbestigador labot sa iyang gibuhat aron sayon nga sabton di lang sa mga reporter, apil na sa mga tagtungod sa kaso. Matod niya duna nay plano ang PRO-7 labot niini. Sa akong nahinumduman kadto pa ko nakatambong og presscon nga undanon ug tinuod gyud nga balita ang gipanghisgutan. Di parehas sa ubang presscon nga pulos lang grandstanding ang motibo.
PANGANDOY
Sa mga inahan nga nagbasa karon, unsay inyong bation nga human sa unom ka tuig nga paningkamot sa inyong anak nga makatapos sa elementarya inay diploma kamatayon maoy nadawat? Nagbangutan di lang ang mga ginikanan ug kaparentihan ni Jeffrey Sabroso, apil na ang mga magtutudlo ug tinun-an sa Alaska Elementary School sa Barangay Mambaling, Cebu City, sa dihang nilanog ang balita nga siya gidunggab ug namatay niadtong Miyerkules sa gabii. Wa gyuy igong hinungdan nga buhatan siya sa ingon sa usa ka Jose Bangkal nga taga Alaska ra sab.
Paitang kamatayona. Unta karong Domingo apil si Jeffrey nga mopaso kauban sa 291 ka mga gradwado sa elementarya.
Matod sa iyang maestra nga si Lindsey Baclayon buotan ug kugihan nga pagka estudyante si Jeffrey. Ang iyang suod nga higala nga si Benjie Seville naghilak nga nitug-an nako sa mga plano ni Jeffrey. Usa na niini mao ang paghaw-as sa iyang pamilya gikan sa ka kabos. Pangandoy sa usa ka batan-on nga ang namat-an og kahayag mao ang tumang kawad-on diha sa Alaska, Mambaling. Manghinaot ta nga mahatagan og dinaliang hustisya ang kamatayon ni Jeffrey. Ako sab nga hangyuon si Mayor Michael Rama, tabangan nato ang pamilya ni Jeffrey, basin naay masudlan og trabaho ang iyang inahan kay daghan sab kaayo og igsoon ang namatay.