KAY lagi kaliwat ni Lapu-Lapu, na hala, pinabusdik gyod ang dughan ug pinatuskig nga barogan ang kabagsik. Angay gyud nga magbantay ang mga dumuduong dinhi sa Sugbo, bisan pa’g kuwang na lang ta magbilangkad sa atong kahinam paghangop sa mga turista. Dili gyud sila magpatuyang og tinunto. Pastilan, hastang humoka ra ba intawon pislaton sa taas apan talandugon natong garbo.

Bisan pa’g bagis, dali ra kaayo tang katilaw og uwaw kon batoon ta’g tamatis. Ug dayag nga wala ta’y dagway ikaatubang kon pauwanan pod ta’g labay og mga hiniwa sa sibuyas bombay. Ay, kinsa’y di kahilakon anang kalakiha?

Aguroy, dali gyud mopiratpirat atong mata sa kahalang kon naa’y mga sipat nga taga Manila nga paturagas la’g pawitik sa hait nga dila?

Mahinumdoman sa niaging tuig nga hastang panagang intawon ni Gloria Diaz. Bisan kon nakahatag siya’g dakong garbo sa nasod, gibantog nga labing maanyag sa tanang kababayen-an dihang gikuronahan siya isip Miss Universe 1969, wa’y kalainan siya uyamot sa sagbot sa panan-aw sa mga taga-Sugbo. Gikataho nga nakamenos kuno siya sa atong pinadolyar nga linitukan. Bulay-og kuno kaayo ang bwelo sa atong inenglisan, lakip na atong tinagalog.

Apan dili kuno kana mao’y iyang gipasabot, patin-aw pa ni Diaz. Kay kuno buot ra niyang iduso ang sugyot alang sa mga Bisdak nga kandidata sa mga beauty pageants nga labing maayo kon lumad nga pinulongan na lang ang paghot sa ilang tubag atol sa Q-and-A portion. 

Hangtod sa iyang pagpangayo’g pasaylo sa mga Sugboanon, bisan pa sa iyang madanihon nga pahiyom, gitan-aw gihapon nga lupig pa’y sanglahon. Persona non grata, pwera buyag!

Ug kini, dili pa lang dugay, mao po’y buot itawag sa kagamhanan sa Kapitolyo sa Sugbo ngadto sa mag-aawit nga si Rico J. Puno. Nasayran nato nga hastang ngiyaw sa nakadungog sa  iyang pasiaw pakapin sa iyang harana ni Gov. Gwen Garcia. Gipakauwawan kuno ang labing gamhanan sa Kapitolyo. Ambot lang og wala ba kaha giawat ni Puno ang tingog ni Mayor Tomas Osmeña nga kanunay alingisig kaayo sa paminaw sa gobernadora?

Kuyaw maglikay na’g balik sa Sugbo si Puno karon nga galaraw og panimalos ang duha ka sakop sa Provincial Board (PB) sa Sugbo, kuwang na lang bitayon siya sa mga punoan sa Perrelos sa dili pa kini gabson ug tumbahon.

Bitaw, sama sa gipakita ni Lapu-Lapu, dili gyud pabentaha ang mga Bisdak. Apan dili ba pod kaha ning atong panit nga wa’y kalainan sa sibuyas bombay—dali rang mopalugmaw sa mata—usa ka timailhan sa atong insecurity kon kakuwang sa kasegurohan sa atong gipakitang kalig-on?  Kay kon lig-on pa ta’g salig sa kaugalingon, dili baya unta ta daling tandugon.

Ay, manghinaot na lang ta nga si Kris Aquino—nailhan sa iyang pagaka-tactless—wala’y ikasulti kabahin sa Sugbo. Basin makaubo siya’g ahat kon siya na po’y tawgon uban nilang Gloria Diaz ug Rico Puno nga dili ingon nato. (geemyko@gmail.com)