KAPIN sa 20 ka mga garbage truck ang wa pasudla sa Inayawan sanitary landfill usa ka adlaw human hingpit nga gipatuman ang no segregation, no collection policy dinhi sa dakbayan sa Sugbo.

Si Randy Navarro, tagduma sa landfill, nibutyag nga 22 ka mga garbage truck sa barangay ug laing duha gikan sa Department of Public Services (DPS) gipabalik sanglit wa bahiga ang mga basura nga ilang karga hinungdan nga nagsagol ang malata ug di malata.

Hinuon kagahapon sa hapon, aduna nay mga garbage truck nga nakasulod gikan sa 22 ka mga barangay sanglit ila na mang nalain-lain ang basura.

Matod pa ni Navarro nga ila gyung gipanghingusgan ug hingpit nga gitamod ang mando ni Mayor Michael Rama nga no segregation, no collection policy ug ang mga garbage truck nga di motuman di sab makasud sa landfill.

Sa gate pa lang, duha ka inspectors ang gibutang ni Navarro samtang laing mga sakop sa City Environment Sanitation Enforcement Team (Ceset) maoy mosusi sa mga dump truck.

Karong adlawa, ang Ceset mo-issue na og citation ticket ngadto sa mga truck driver nga magda og di binahig nga basura ug pamultahon og P500 sa unang pagkasayop, P1, 000 sa ikaduhang higayon ug pagkapriso sa ikutulong hugna.

Gibutyag ni Navarro nga napahimutang na ang 12 ka shredder machines nga maoy mogaling sa basurang malata ug di malata, samtang giandam sab ang carbonizer ug bioreactor nga maoy tipik ug kabahin sa proseso sa paggaling sa basura.

Dugang pa ni Navarro nga ang tanang basura nga motugpa sa landfill galingon.

Ang malata nga basura himuon nga abuno ug aduna silay giandam nga luna alang sa composting ug ang di malata sama sa plastic himuon nga brickets o isagol sa paggama og hollow block, foot path ug isagol sa semento.