USA ka 16 anyos nga tinun-an ang giluba kinsa natulog uban ang iyang manghod nga 12 anyos niadtong Huwebes sa kaadlawon didto sa Sityo San Roque, Barangay Baybay, lungsod sa Malalag, Davao del Sur.

Si Gina (di tinuod nga ngalan), tinun-an sa Davao del Sur School of Fisheries ug nagpuyo sa nahisgutang lugar, gidala sa balay tambalanan human giluba uban ang iyang manghod nga si Joy (di sab tinuod nga ngan) kinsa nangatulog ala una ang takna sa kaadlawon.

Si Gina nakamata sa dihang nitaop na ang kutsilyo sa iyang likod ug nasiplatan ang suspek nga giingong si Ian Antipona, 20, ulitawo ug lumolupyo sa Barangay Upper Puting Bato Calumpang, dakbayan sa General Santos.

Si Antipona, human mahimo ang krimen, midali sa pagsibat palayo sa nahitaboan.

Apan human ang pipila ka oras nasikop siya sa kapulisan didto sa Sityo San Vicente, Barangay New Baclayon sa maong lungsod.

Ang biktima gihatud sa Davao del Sur Provincial Hospital (DDSPH) ug gihulagway nga luwas na sa talandugong kahimtang.

Si PO2 Jonalou Ca¤ada kinsa maoy mihimo og pakisusi nagkanayon nga narekober sa nahitaboan sa mga nirespondeng kapulisan ang nagkadugo nga kutsilyo nga dunay gitas-on nga kapin kun kulang 6 pulgadas nga gituohan nga nabiyaan sa suspek.

Nagtuo ang kapulisan nga ang selpon lang nga Nokia E71 ang tuyo sa suspek apan tungod kay nakamata ang biktima hinungdan nga iya kining giluba.

Ang suspek gilayong gibalhog sa prisohan ug gipasakaan og kasong frustrated murder. (Dondon Dinoy)