GILUBONG na kagahapong adlawa ang namatay nga priso kinsa gipusil sa sinaligan sa kapulisan sa Bansalan Police Station niadtong milabay'ng semana.

Si Restituto Malait hingpit nang gihatud ngadto sa iyang katapusang pahulayan apan kabanay padayon nga nangita og hustisya sa iyang gidangatan.

Si Lourdes, asawa sa biktima, nabuhian og tunok human giduso ang kasong murder batok sa suspek nga si Gibsam Fernandez, kinsa janitor ug kusinero sa kapulisan.

"Mangayo gyud mi og hustisya ani kay abi namo luwas ang piniriso sa ilang selda pero namatay naman hinuon," pung ni Lourdes.

Si Fernandez giingong kanhi piniriso sa Bansalan Police Station tungod sa kasong frustrated homicide apan gibuhian human mabasura ang kaso sa hukmanan.

Unang giluwatan ni Fernandez nga nakuha niya ang 9mm nga pistola nga

gipanag-iyahan ni SPO2 Florante Jabonero nga maoy iyang gigamit sa pagpusil kang Malait nga gibutang sa ibabaw sa lamesa.

Apan nausab ang pahayag sa suspek ug nagkanayon nga nakuha niya ang maong armas human gilungkab ang locker ni Jabonero, sama sa gisulti ni Senior Inspector Deozar Almaza, hepe sa Bansalan Police Station.

"Gilungkab nako ang locker sa lamesa mao na to," hamubong sulti sa suspek.

Gikanayon sa pamunuan sa Davao del Sur Provincial Police Office (DDSPPO) nga giimbestigahan na sa Regional Police Office ug hayan mag-atubang og kasong kasong administratibo sila si Jabonero ug SPO3 Teopanes Leornas, ang jailguard niadtong Marso 24, kon mapamatud-an nga nagpabaya sa ilang katungdanan.

"Amo gyud nang tinud-on para ma-leksyon nang mga pulis diha kon nganong

gipasagdan nila ilang bata-bata. Nagtuo mi nga luwas ilang prisohan pero naunsa na ni," pagbangutan sa asawa sa biktima.

Si Police Supt. Ronald dela Rosa, provincial police director, nipasalig nga imbestigahan gyud nila ang nahitabo.

"As provincial director, immaterial na sa amoa kon gilungkab or ibabaw sa lamesa nakuha ang armas. Manubag ang pulis nga duty kay dapat gyud naa sa iyang hawak ang armas dili kay kon asa ibutang," ni dela Rosa.

"Wala mi ma-satisfied sa tubag sa atong mga pulis mao gipasa namo sa region ang kaso. Responsibilidad sa usa ka pulis kon iyang baril ang magamit sa pagpatay," dason sa opisyal. (Dondon Dinoy)