SA HIGAYON nga modesisyon si Regional Trial Court (RTC) Judge Meinrado ‘Menmen’ Paredes sa pagpakawalay bili sa iyang kaugalingong gi-isyo nga search warrant nga gigamit sa kapulisan aron pagronda sa panimalay ni Bella Ruby Santos sa Inayagan, Naga City, makapahuyang kini sa kaso sa kapulisan nga gipasaka batok kang Santos ug sa hinigugma niining British national nga si Ian Charles Geriffiths.
Ngano man? Gumikan kay apil sa mahulog nga illegally search items o evidence mao man ang Pajero nga gipanag-iya sa akusado. Ang maong sakyanan importante kaayo sa maong kaso pagpalig-on sa ebedensiya sa kapulisan kay mao man kini ang nakit-an sa mga saksi nga gisakyan sa mga akusado sa dihang ilang gidani ang sayes anyos nga si Ellah Joy Pique sa paggawas sa bata gikan sa Calajoan Elementary School.
MAHUYANG ANG KASO
Unya ang susamang sakyanan mao usab ang nakit-an sa laing mga saksi nga maoy gigamit sa mga akusado sa paglabay sa patay’ng lawas sa biktima diha sa hilit nga lugar sa barangay Sayaw, Barili pagka-ugma sa kadlawon human gidagit ang bata niadtong Pebrero 7. Ang habol nga adunay dugo nga nakuha gihapon sa balay ni Bella Santos, apil usab niini. Apil pa ang ubang ebedensiya. Pasagdi na lang tong mga ‘sextoys’ o vibrator kay personal kadto nga gamit ni Bella.
Gipangutana siya ni Alan Domingo, reporter sa GMA 7 Balitang Bisdak, nga para asa daw tong’sextoys’? Mitubag si Bella ‘hayy, hibawo bitaw ka nga long distance man ning among love affair sa akong boyfriend’. Aw, diay ba, ana diay na? Makatabang diay na sa long distance affair? Karon pa ko kahibawo ana. Pagkatoytoy!.
Unsa naman lang ang mahibilin nga ebedensya sa kapulisan aron ilang makombensi ang piskaliya nga mapasaka ang kaso sa korte? Ang mga testimonya na lang sa mga managlahing saksi. Ang saksi sa Minglanilla nga motumbok nila ni Santos ug Grififths nga sakay sa Pajero nga aduna plate number nga LMJ 382. Ingon man ang saksi sa Sayaw nga walay klaro. Kuyaw og ‘matutyo’ na usab ning kasoha. ‘Matutyo’ termino na sa sugal nga piyat-piyat. Kanang baraha nga walay dag-anan.
NAMINAW
Maayo kay naminaw si Bella Santos sa akong tambag nga gikinahanglan nga pangku-on niya ang iyang buhok aron makita ang iyang maanyag nga dagway. Unya tangtangon niya iyang shade inig atubangsa kamera. Kaniadto gud ang iyang buhok motabon sa iyang nawong.
Mora na hinuon siya og ungo. Karon, tan awa di ba molutaw na ang iyang pagka-maanyag.
Morag dili siya makahimo sa maong krimen.
(bobby@sunstar.com.ph)