BUSY kaayo ang mga cycling enthusiast sa miaging semana tungod sa duha ka dagkong mga kalihukan. Niadtong Sabado sa gabii, kapin sa 1000 ka mga siklista ang nangapil sa Earth Hour Night Ride nga gipasiugdahan sa Habagat ug giabagan sa R.O.X.

Kami ni Jay Garganera wa makatuo sa kadaghan sa nangapil sa mao nga kalihukan kay mas daghan pa ni itandi sa miaging tuig. Nagkadaiyang bikes ang gipangdala sa mga ningsalmot. Dunay folding bikes, vintage, mountain bikes, road bikes ug BMX.

Sunod tuig gikinahanglan ang mas dako nga hawan kay diha na gani sa gawas sa The Outpost, daplin sa karsada, ang mga siklista nagpundo samtang naghuwat sa pagsugod.

Pagkaugma, Bike Festival na sab ang gipahigayon sa South Road Properties. Dunay gipahigayong mga lumba sa mountain ug road bike. Pagkahapon, nagpalumba ang mga organizer og folding bikes, nga gisalmutan sa mga photo journalist. Ang nikampeyon mao ang road biker nga si Allan Defensor, usa sa amoang mga photographer sa Sun.Star.

Pamilya

Sukad amoang gisugdan ang Friday night ride, nagsige mig encourage, labina si Jay, nga manguyog ang pamilya. Duna gyuy parents nga ningdala sa ilang mga anak. Naay uban namalit og folding bikes aron makakuyog ang ilang anak.

Niadtong Biyernes sa gabii, nikuyog namo ang anak ni Gobernador Gwen Garcia nga si Paolo. Uban niya ang iyang asawa nga si Michelle ug ilang anak nga lalake nga si Jules.

Nalipay og maayo si Paolo human sa ride. Nindot kaayo ang iyang experience kay pinaagi sa folding bikes, ang iyang pamilya nagkauban sa usa ka matang sa sport. Di sab to sayon ang gilay-on alang sa ordinaryong biker kay mga 22 kilometros ang amoang gibiyahe. Miabot mi og 122 dihang giihap. Apan 88 ang officially nagpa-register kay duna may raffle pagkahuman samtang nangaon og pospas.

Si Jules ang midaog sa sleeping bag. Nisaad si Paolo nga modonar og mga bola sa basketball alang sa raffle.

Gawas kanila, duna say laing mga magtiayon sama nila ni Vince ug iyang asawa. Diha sab sila si Dongdong ug Sheryll, akong mga kauban sa Sun.Star.

Summer

Karong summer daghan ang mga sports activity. Basin dunay higayon, sa ikaduhang higayon akong paapilon ang akong mga bata sa Wushu summer class.

Diha sa dapit sa Pasil ug Suba, dunay kalingawan ang mga bata. Ang banay nga Maranga nagtanyag og Arnis class. Nipahibawo nako ang akong kumare ug suod kaayo nga higala nga si Izon Mara-nga pinaagi sa Facebook.

Ilado na ang mga Maranga kon Arnis ang hisgutan. Busa, kadtong mga ginikanan diha nga ganahan nga mahilayo ang ilang mga anak sa kabuang, mas maayong mopa-enroll mo sa Arnis class sa mga Maranga.