HABAL-HABAL driver gipatay sa iyang silingan human sila magkasinukmagay dihang nagkaabot niadtong Biyernes sa gabii sa Sitio Kapulay, Barangay Tayud, lungsod sa Lilo-an, Sugbo.

Si Renel Sugarol, 24, ulitawo, taga Sitio Simburio sa nahisgutang lugar, ang dead-on-arrival (DOA) sa Vicente Soto Memorial Medical Center (VSMMC) human makaangkog samad pinusilan sa iyang lawas.

Gitumbok nga suspek si Jolito “Jojo” Abiar, 28, habalhabal driver, taga Sitio Fatima, Barangay Jubay sa nahisgutang lugar.

Si Abiar nakaeskapo human sa pagpamusil.

Si PO3 Routchil Jugalbot, desk officer sa Lilo-an Police Station nga nahinabi sa Sun.Star Superbalita, niingon nga sa wa pa mahitabo ang krimin, ang biktima ug suspek nagkaaway niadtong miaging adlaw.

Gingong gigukod og kutsilyo sa suspek ang biktima kinsa nikaratel sa pagdagan.

Dihang nagkaabot sila niadtong Biyernes sa alas 10:30 sa gabii, nagkasinumbagay ang duha.

Apan ang suspek kinsa nalupig sa sinukmagay nikaratel usab sa pagdagan paingon sa ngitngit nga lugar, nga gigukod sa biktima.

Apan kalit lang dunay nadungog nga mga buto sa armas ang mga tawo.

Pipila ka gutlo ang biktima migawas gikan sa ngi-ob nga lugar ug nangayog panabang sanglit siya gipusil hinungdan nga gidala sa tambalanan.

Apan gideklarar sa mga doctor nga DOA.

Daling nahanaw ang suspek ug pag-abot sa kapulisan nakit-an ang tulo ka mga bala sa kalibre 45. nga pistola sa crime scene.