GIANDAM na sa Mandaue City Police Office (MCPO) ang tukmang kaso batok sa lima ka mga suspek nga nakuhan og usa ka kilong cocaine nga mokantidad og P5 milyones.

Kini human nasuta nga cocaine ug shabu gyod ang ilang nasakmit sa kapulisan base sa resulta sa PNP Crime Laboratory examination.

Kahinumdoman nga nasikop sa kapulisan sa Mandaue sa usa ka buy-bust operation si Parhana Ebrahim sa barangay Mantuyong niadtong Huwebes sa kaadlawon.

Nisuway pag-eskapo ang suspek pinaagi sa pagsulod sa iyang balay, hinungdan nga gigukod siya sa kapulisan.

Didto na makaplagi sa kapulisan ang usa ka kilong cocaine ingon man mga armas.

Gawas kang Ebrahim, nasikop usab ang lain pang upat ka mga tawo nga didto sa balay ni Ebrahim nga naglakip kanila ni Ali Dimasanggay, Dandy Sultan, Raisa Dilinogun ug Palawan Datukunog.

Si Senior Supt. Noel Gillamac, director sa MCPO, nibutyag nga nigawas na ang resulta ug positibo gyod nga cocaine ang ilang nakuha.

Matod ni Gillamac nga daan na siyang nasayod nga cocaine ang ilang nasakmit tungod kay iya na kining gipahiling sa usa ka pribadong laboratory sa wa pa nila gipresentar sa media.

“Maniguro ta no kay daghan na baya nga hitabo nga drugas pero pag-laboratory negative unya gipahibawo na sa media. Mauwaw ta ba,” pasabot ni Gillamac.

Karong Lunes ipasaka na sa kapulisan sa Mandaue ang kasong paghupot ug pagbaligyag drugas.

Kini wa pay labot sa kaso nga paghupot og ilegal nga armas sanglit nasuta man usab nga way lisensya ang duha ka mga pusil nga gisakmit.