GIATIMAN sa Vallacar Trans ang unom ka mga tawo, nga naglakip sa ilang driver, nga nangaangol human gidaro sa Ceres bus ang nag-parking nga truck sa Barangay Tina-an, dakbayan sa Naga.
Ang driver sa bus hayan masuspenso o mawagtangan sa iyang trabaho tungod sa mao nga hitabo.
Si Anselmo “Jun” Ambos, manager sa Vallacar Trans Cebu branch nga tag-iya sa Ceres bus, nagkanayon nga human sa insidente gidala dayon sa tambalanan nga ilang gusto ang mga biktima.
Human kini maatiman sa mga doktor, gitugotan ra usab dayon kini nga makapauli.
Gibutyag ni Ambos nga ilang gihatagan og katungod ang mga biktima kon asa sila gusto nga magpatambal.
Wa nila igbali ang ilang mga nagasto basta maatiman dayon ang mga biktima.
Matod pa ni Ambos nga adunay pipila ka mga lugar sa dapit nga nahitabo-an nga wa magsiga ang poste hinungdan nga di dayon kini mabantayan sa ilang mga driver.
Aduna usay mga driver nga magpataka og overtake sa nag-una nilang mga sakyanan.
Gibutyag usab ni Ambos nga well-trained ang ilang mga driver sa bus human nila kini gipaubos sa pagbansay-bansay sa wa pa tugoti nga makamaniho sa ilang bus.
Usa ka training school alang sa tanan nga driver sa Ceres bus ang gitukod sa siyudad sa Bacolod.
Kadtong mga nakapasar sa pagbansay-bansay ug road courtesy mao lamang ang maka-gradwar ug gitugotan nga makamaniho sa ilang mga sakyanan, pasabot ni Ambos.
Ipaubos sa imbestigasyon si Arnold Andrade ug kon mamatud-an nga kini nagpabaya sa iyang trabaho, hayan nga kini masuspenso o mawagtangan sa iyang trabaho.
Sa sayo pa, ang Ceres bus may plate number RJS-850 nga gimaniho ni Andrade, midaro sa nagparking nga truck de karga may plate number GBW-224.