NITAHAN sa kapulisan ang 16-anyos nga dalaga nga gitumbok nga maoy mastermind sa plano sa pagpatay sa usa ka langyaw sulod sa iyang apartment sa dalan Sanciangko, dakbayan sa Sugbo niadtong Miyerkules sa gabii.

Kini human siya gitawgan sa ilang class adviser sa telepuno dihang nasayod sa iyang pagkalambigit sa krimen.

Ang suspek nga naa na sa custody sa kapulisan niangkon nga ang usa sa mga suspek sa pagpatay kang Leamon Wesley Casteen iyang uyab.

Apan kusganon siyang nanghimakak nga siya ang nagplano sa krimen ug gisugo ang triggerman sa pagpusil.

Si “Ivy,” taga sityo Lawis, Alaska Mambaling, gi-pick up nila ni Chief Inspector George Ylanan atubangan sa usa ka tindahan sa Barangay Tabunok, Talisay City, pasado alas 7 niadtong Biyernes sa gabii.

Ang batan-ong dalaga giubanan sa iyang amahan nga si “Jorie” nga maoy nakakita sa suspek didto sa Pinamungajan kay iyang giapas sa lalawigan dihang padung na untang mosibat ngadto sa Negros Oriental.

Si “Ivy” nga mogradwar unta kagahapon sa high school nga nahinabi sa Sun.Star Superbalita, niangkon nga iyang uyab ang pabilin nga gawasnon nga si Aldez Flores, alias Boboy, 27.

Si Flores ang gitumbok nga tag-iya sa mga armas nga gigamit sa pagpusil sa American national.

Siya niasoy nga sa wa pa ang hitabo, iyang gisumbong kang Flores nga diriyot siya logosa sa langyaw sulod sa apartment nga gipuy-an niini.

Nasuko si Flores human masayod sa hitabo ug nangutana kaniya kon asa nagpuyo ang langyaw kay gusto siyang makigkita.

Namalibad unta siya, apan tungod sa kahadlok nga masuko si Flores, iyang gisanong nga ilang adtuon nianang gabii.

Nakita niya si Flores nga may gitawagan sa cell phone ang suspek ug wa magdugay nag-abot sila sa gunman nga si Jordan Cyril Galliste.

Sa dihang didto na sila sa apartment, si Ivy nanuk-tok sa pultahan ug sa pag-abli sa langyaw, masuk-anon kining nakig-atubang kaniya ug dayon siya gitamparos.

Nakakita niini si Galliste, nibunot kini og armas.

Si Ivy niingon nadungog niya ang sunod-sunod nga mga buto sa armas de fuego ug nakita si Casteen nga natumba ug nabulit na sa dugo.

Human sa krimen ningsibat sila ug didto nitago sa balay sa ilang higala sa Labangon ug nianang buntag sa Biyernes nigikan sila paingon sa Toledo aron mosakay og bapor paingon sa Negros Island.

Nausab ang iyang huna-huna human siya gitawagan sa iyang class adviser nga si Helen Sabino sa pagtahan sa iyang kaugalingon.

Niadtong Biyernes, gikan sa Toledo, milahos siya sa iyang higala sa lungsod sa Pinamungajan ug didto matulog sa balay niini.

Gitawagan niya ang iyang amahan nga andam na siyang motahan sa iyang kaugalingon human niya makita sa Sun.Star Superbalita nga na-headline ang hitabo.

Apan samtang diha pa siya sa dalan, nalabyan siya sa iyang amahan nga nagsakay og bus paingon sa Aloguinsan hinungdan nga dungan silang namalik dinhi sa Sugbo nianang pagka hapon sa Biernes.

Nasabutan nga magpa pick up si Ivy sa kapolisan atubangan sa usa ka tindahan sa Tabunok, hangtud nga naabot sila si Ylanan nianang pasado alas 7 sa gabi ug gidala siya sa Cebu City Police Office (CCPO).

Sa pagka karon, pabilin nga gawasnon mao na lang si Floreshuman madakpi sila si Daryl ug Lovely ug nitahan si Galliste.

Si Ivy maoy gitumbok nga mastermind sa ubang mga suspek.

Si Gallister sa sayo pa, nitug-an sa kapulisan nga wa siyay tumong sa pagpatay sa Kano.

Iya kining gibadlong dihang gidapatan si Ivy sa ilang pag-abot sa apartment niini.

Wa kini mopatuo sa iyang pagbadlong nasuko hinuon ug siya ang giatubang.

Dihang gipakita niya kini sa armas, si Casteen giingong wa mahadlok, nihamag hinuon kaniya hinungdan nga iyang napusilan.

Ang kapulisan nakakuha og mga bala sa kalibre. 45 nga pistola, .38 kalibreng revolver ug bala sa M16 armalite rifle.