HUMAN sa pipila ka adlaw nga mialisngaw ang aso sa isyu bahin sa 'pabawon' sa Aboitiz Power Corporation, mitingog na mahitungod niini si Bise Mayor Rody Duterte.

Ang bise mayor nagkanayon nga di dautan ang pagdawat sa mga konsehal og sais mil pesos sanglit kabahin kini sa galastuhan sa kompanya nga buot motukod sa coal-fired power plant dinhi sa siyudad sa Davao.

Tungod kay nagka-init na ang maong isyu, midepensa na ang bise mayor ngadto sa mga konsehal nga miduaw sa coal-fired power plant didto sa Villanueva, Misamis Oriental.

Gihimo kini sa mga konsehal aron istudyohan kung unsa ang dagan sa operasyon sa maong planta, makaayo ba kini kung mag-operate na dinhi sa dakbayan.

Sa pipila ka mga konsehal nga miduaw sa planta, si Konsehal Emmanuel Galicia lamang ang miangkon nga nakadawat sa maong kantidad.

Gipasabot sa mga konsehal nga ang kantidad nga ilang nadawat reimbursement kadto sa ilang nagasto atol sa ilang biyahe sa maong lugar.

Suma sa bise mayor nga kung midawat man og salapi ang mga konsehal, wa kini magpasabot nga nagpabayad na sila, mitugot na sila nga paliton ang ilang boto aron paboran ang proyekto.

Ang bise mayor mipasabot nga ang biyahe sa mga konsehal wa naplano sa miaging tuig mao nga way badyet alang niini hinungdan nga kinahanglan nga mogasto gayud ang kompanya.

Alang kaniya di sab maayo nga mga konsehal maoy mogasto sa ilang kaugalingon nga salapi sa ilang pagbiyahe didto sanglit diyutay lang sab ang ilang kinitian.

Atong girespeto ang pahayag sa tanang hintungdan sa maong isyu, apan sanglit dunay pagahimuon nga imbestigasyon ang Ombudsman Mindanao, ato nalang isalig kanila ang tanan!