NAKASULOD sa quarter finals sila fifth seed Andre Banate ug John Jeric Accion human nga gipildi nila ang tagsa-tagsa ka kalaban sa boys 18-under division sa nagpadayon nga 2011 Smart-Head Junior Tennis Satellite Circuit second leg didto sa Eco 4 Tennis Club ning siyudad sa Dabaw.
Gipildi ni Banate si Wowie Espinosa sa iskor nga 10-6 diin iyang maka-atbang si third-seed Rogelio Estanio, Jr. sa Parang, Maguindanao sa quarter finals samtang ang kinse anyos nga si Accion sa Sta. Ana National High School gilampaso si Ramsel Longakit sa iskor nga 10-6.
Sa Boys 16-under No. 2, midaug sab si Accion diin iyang gipildi si Espinosa sa iskor 10-5 sa maong torneyo nga giubanan ni Philippine Tennis Association (Philta) regional vice-president ug tour director Juanito "Titong" Cansino, Jr.
Si Accion ang nanguna sa kadaugan alang sa unang round nga giubanan sab nila Ivan Diamate, Hakeem Cariga, Jesurex Oring, Allian Abdulqahar, Elvie Lopez, Jr., Christian Fel Lopez ug Justin Regino.
Mihatag og gamay'ng mensahe si Mercantile Corporation (Merco) president Anton Ferrazzini sa gihimong opening rites nga ang mga partispante nalingaw sa libreng pagkaon ug Selecta ice cream.
Ang Philta ranking points, trophies ug tennis merchandise ang naghuwat sa mahimong kampeyon ug runners-up samtang brand new cellphones ang ihatag sa 'best players of the leg'. (MLSA)