SI Davao City Vice Mayor Rodrigo Duterte nagpahimangno kagahapon sa mga sakop sa media kinsa giingon nga nagpadako sa isyu bahin sa pagnegosyo og basura sa iyang anak nga si Sebastian Duterte.

Ang bise mayor nagkanayon nga di angay sukit-sukiton sa mga sakop sa media ang tanang butang bahin sa pagnegosyo sa iyang anak nga naningkamot sab sa iyang kaugalingon.

Si Duterte nagkanayon nga ang iyang anak nakahukom nga magnegosyo tungod kay di na makasuporta kaniya ang iyang amahan sa iyang panginahanglan.

"Kining akong anak, 22 years old na. Niadtong Marso, wala pa man siya makatapos sa iyang pag-eskwela, miingon ko sa iyang nga dapat tapos ka na kay daghan ko gastuhanan, daghan pa ka og igsuon nga gagmay, limitado na akong income. Giingnan nako siya nga dili nako mohatag nimo og kwarta. Bayaran lang nako nang imong tuition kay obligasyon ko man na," pahayag ni Duterte kagahapon atol sa iyang programang Gikan sa Masa, Para sa Masa sa ABS-CBN.

Si Duterte mipasabot nga iyang giingnan ang iyang anak nga mangita og paagi nga mokita alang sa iyang allowance.

"Giingnan nako siya nga pangita sa imong pang-adlaw-adlaw nga allowance, gasolina, imo na. Nangita siguro og kapital, miduol siya sa ako, miingon nga magnegosyo nalang ko og basura kanang mga plastic nga ma-recycle, mabaligya man na, musulod nalang ko ana. Ana ko sa iya nga ikaw bahala basta pagbantay lang sa pagkawkaw diha para dili ka masakit," pung sa amahan nga bise mayor.

Si Duterte nagbutyag nga iyang gitambagan ang iyang anak nga mokuha og business permit ug mangita og kasosyo sa negosyo.

"Ingon ko sa iya nga suwayi lang usa kuha og busiess permit, company o partnership ba. So, iyang gikuha si Andrei Boco, unya ingon ko sa iya nga ayaw pataka og negosyo kay mabiyaan na nimo imong eskwela."

Gisulti sa bise mayor nga miguwa ang isyu dihang gisukit-sukit sa duha ka mga sakop sa media ang kasosyo sa iyang anak.

"Ang problema niini, si Bobby Largo ug Jong Jong Suico, (amigo nako ni sila) nagsige og pangutana. Naay nanawag nga nag-ingon anak sa bise mayor nag negosyo, pagkahuman didto sila ila Boco. Ang problema ninyo kay inyo ginapangutana ang tibuok detalye, tinuod ba ni si Sebastian ang partner niya? Ang bata mora'g nahadlok, tan-aw pud nila mora'g wala pay permit, kana bang pangayo-pangayo ba? Ang problema, just because anak siya sa bise maayor unya nag negosyo siya og basura, unsa may labot ninyo? Actually, kung inyo ng buhaton ang magtuki-tuki sa kinabuhi sa tawo that is already an envasion to privacy and under the constitution pwede mo idemanda ana." ni Duterte.

Gipahayag sa bise mayor nga way labot ang gobyerno lakip na ang mga sakop sa media sa personal nga kinabuhi ug sa pagnegusyo sa iyang anak.

"Kana ganing mangita mo'g balita human iapil-apil ninyo na kay tungod anak nako, ayaw ana. He just tried to earn a living. Kana inyong pagpangigo og tao, simhot, simhot mo kay naa mo makita nga issue sa mayor, basura? Wala moy labot diha, ang gobyerno walay labot diha, basura na. Ayaw mo pangawarta! Nangita jud mo ug sakit sa ulo eh," panapos ni Duterte.

Gitawgan sa Superbalita ang duha ka mga media kagahapon apan sila naghangyo nga di na lang mokumentaryo. (Ivy C. Tejano)