DILI uyon si Bise Mayor Rody Duterte sa sugyot sa Land Transportation Franchising and Regulatory Board (LTFRB) nga mobiyahe ang mga bus sa nag-unang kadalanan sa siyudad isip alternatibo sa jeepney.
Kahinumduman nga sa nakalabay nga semana gibutyag ni LTFRB-Davao Director Benjamin Go nga tun-an nila ang pag-deploy og bus sa mga dalan sa siyudad, aron sab nga di maapektuhan ang mga commutters sa gihimong transport strike sa draybers ug operators sa nakalabay nga Huwebes.
Ni Go atol sa maong adlaw sa strike masuwayan kun epektibo bang tugutan ang mga bus nga makabiyahe sa mga dalan ning siyudad.
Apan alang ni Duterte luyo nga dagko kaayo ang bus, dili sab ana kalapad ang dalan dinhi, daghang drayber ug operators pa ang makulban og kaldero sa maong sugyot.
"Not the time. You will displace a lot of people. Dako ra kaayo na, duha ka bus magbaabag sa lane wala na. Maligsan ang daghang drivers. We have narrow streets. I do not agree with the assessment na mas mahapsay ang dalan. But we can establish some sort of satellite, but not sa downtown area. LTFRB should reconfigure their dimensions in that area," ni Duterte sa iyang programa nga Gikan sa Masa Para sa Masa.
Luyo sa bise mayor, dili sab uyon sa maong plano si Davao City Mayor Inday Sara Duterte.
Sumala sa mayor nga dili basta-basta maduso ang maong plano, gikinahanglan pa kini nga tun-an pag-ayo.
Tungod sab sa maong sugyot ni Go, daghang operators ug draybers ang naglungot-lungot sa kalagot ngadto sa opisyal, milusad og signature campaign aron mapalagpot ang LTFRB regional director sa iyang katungdanan. (Rhona Goc-ong)