USA ka negusyante ang gipusil ug gitulis sa duha ka wa mailhing mga lalaki didto sa Purok Magsanoc, Barangay Mankilam, siyudad sa Tagum niadtong Biyernes.

Ang biktima giila sa kapulisan nga mao si Bonifacio Santiago, 51, molupyo sa dalang Lapu-lapu, dakbayan sa Tagum.

Base sa report sa Davao del Norte Police Provincial Office, nasayran nga nahitabo ang insidente alas 8:30 sa gabii samtang kauban sa biktima ang iyang asawa, anak nga babaye ug katabang sakay sa ilang sakyanan nga Nissan.

Pugsanong gikuha sa mga suspek ang bag sa asawa sa biktima nga dunay sulod nga 50 mil pesos, yawe sa ilahang tindahan ug duha ka yunit nga cellphone.

Human makuha ang tuyo mga suspek, ilang gipusil ng biktima dayon misibat ngadto sa wa masayri nga lugar.

Nakahiagum og samad pinusilan sa kalawasan ang nahisgutang biktima ug daling gidala sa Tagum Doctor's Hospital hinuon ang ang biktima luwas na karon sa makuyaw nga kahimtang.

Mga miresponding sakop sa kapulisan nakahipus og duha ka baseyo sa kalibre .45 nga pistola didto sa nahitabuan sa krimen.

Mga suspek giingon nga sakay sa usa ka Honda XRM nga motor nga way plate number.

Kapulisan sa siyudad sa Tagum mihimo na og dugang imbistigasyon sa maong hitabo. (Marvin Pineda)