USA ka pagpanulis ang nahitabo kagahapon mga alas 8:00 sa buntag sa puloy-anan sa usa ka negusyante sa Barangay Dampias, lungsod sa Binuangan, Misamis Oriental.
Giila ang negusyante nga mao si Samson Chua, 40, minyo, residente sa susamang dapit ug adunay negosyo nga coco lumber, hardware ug nanag-iya ug pipila ka mga 10-wheeler truck.
Si Mercy Dagcuta, kapitan sa Barangay Dampias ug silingan mismo sa biktima, nisaysay nga nagpatuong mga kostumer ang tulo ka mga suspetsado ug giingong nagpasumangil nga adunay importanteng tuyo kang Chua.
Dihang giatubang kini ni Chua diretso kining gitionan og pistola diin nagtagsa pa ang mga suspetsado ug mideklarar og tulis.
Walay duha-duha nga gihatag usab sa negusyante ang iyang bag sa kahadlok nga pusilon ug diretso usab nga milakaw ang mga suspetsado apan giingong nakasinggit si Chua hinungdang nga ang mga trabahante niini nga anaa sa gawas ang daling migukod sa mga suspetsado kinsa daling misakay sa motorsiklo.
Nasayran nga aduna sab diay sakyanan nga giparking sa suspetsado sa sunod nga barangay sa maong lungsod ug didto gipangbutang sa mga suspek ang ilang nakuhang bag gikan kang Chua uban sab sa ilang gigamit nga pistola.
Tungod kay halos gilibotan na ang mga suspek sa mga pulis uban sa daling pagresponde sa kapulisan sa Binuangan Police Station nagukod na usab ang duha ka suspek samtang ang nagmaneho sa motorsiklo milahos sa lungsod sa Salay, Misamis Oriental.
Nadakpan sa mga pulis ug mga residente ang duha ka mga suspetsado sa suba nga bahin diin didto kini nitago.
Samtang naatangan usab sa kapulisan sa lungsod sa Salay ang usa ka suspek nga nagmaneho sa motorsiklo hinungdan sa pagkasikop niini.
Narekober usab gikan sa kolor puti nga Nissan Sentra ang bag nga gipanag-iyahan ni Chua diin gikatahong adunay dul-an P500 mil nga sulod nga giingong gikan sa mga nagbayad niadtong tungora sa biktima.
Apil sa narekober ang tulo ka mga pistola nga nabiyaan gihapon sa sakyanan.
Kasamtangan pa nga gikuha sa kapolisan ang kinatibuk-ang pangalan sa mga suspetsado nga giingong halos dili mosulti sa ilang mga identipikasyon.