PITO ka mga peke nga sakop sa Land Transportation Office (LTO) gisikop sa otoridad sa alas 2:00 sa hapon niadtong Sabado didto sa probinsiya sa Maguindanao.

Nailhan ang mga suspek nga sila Abdulkahar Ampilan, nagpaila nga Chief of Operation sa LTO-Maguindanao, Lidasan Nanalong, Mohammad Mangulamas, Tadzie Ampilan, Datumama Utto, Danda Ampilan ug Abraham Genso.

Si Maguindanao Police Provincial Office director Senior Superintendent Marcelo Pintac nagsulti nga nasiplatan sa mga pulis ug sundalo ang mga suspek nga nanakop ug nangikil sa mga drayber sa mga pampasaherong dyip sa Datu Odin Sinsuat.

Tungod sa ilang gihimo, gisikop sila sa kapulisan nga miresulta sa pagkasakmit sa mga peke nga Temporary Operator's Permit, salapi nga nagkantidad og siyete mil pesos ug mga uniporme sa personahe sa LTO.

Gibutyag ni LTO-Autonomous Region in Muslim Mindanao (Armm) director Omar Datumanong nga dili nila sakop ang pito ka tawo nga nagtakuban nga mga sakop sa LTO.

Daghang reklamo ang nakaabot sa buhatan ni Maguindanao Governor Esmael "Toto" Mangudadatu batok sa maong grupo hinungdan nga iya dayong gipalihok ang kapulisan aron dakpon ang grupo ni Ampilan.

Sa kasamtangan, gibalhug na sa selda sa kapulisan ang mga suspek samtang gipasaka na ang tukmang kaso batok kanila ngadto sa korte. (Edgardo Fuerzas)