USA ka negusyante ang namatay human siya gipusil sa wa mailhing mga lalaki alas 7:45 sa gabii niadtong Sabado didto sa dalang Ponciano, siyudad sa Davao.

Ang biktima giila nga mao si Susan Tahora, 51, minyo, tag-iya sa Baby Rose Fruit Mart nga nahimutang sa Madrazo Compound, dalang Ponciano, ning siyudad.

Si Police Officer 2 Leo Dayuno, duty investigator sa San Pedro Police Station, nagbutyag sa iyang spot report nga ang biktima gipusil sa mamumuno samtang nag-atiman sa iyang tinda nga prutas.

Giingon nga kalit nga giduol sa mamumuno ang biktima dayon gipusil tumong sa iyang tuong mata hinungdan nga natumba siya sa iyang nahimutangan.

Si Julius Tahora, anak sa biktima, nagbutyag nga human gipusil sa mamumuno ang iyang inahan, nakahimo pa siya pag paglayog sa suspek hinungdan nga nakuha ang .38 kalibre nga rebolber.

Ang mamumuno, human nakuha ang iyang armas, nakahimo pa siya pagikyas sakay sa usa ka motorsiklo nga gimaneho sa laing usa ka wa mailhing tawo.

Si Tahora daling gidala sa iyang kabanay didto sa Davao Doctor's Hospital apan gideklara sa mga doktor nga nag-atiman kaniya nagbutyag nga patay na siya dihang miabot sa tambalanan.

Ang armas nga gigamit sa mamumuno sa krimen gikataho nga dunay serial number PRO8034790 mao nga gisusi karon sa kapulisan kung kinsa ang tag-iya sa maong armas.

Si Police Chief Inspector Ceazar Cabuhat, hepe sa San Pedro Police Station, nagmando na karon sa iyang mga sakop nga ilusad ang makuti nga imbestigasyon.

Sa pagsuwat ning balita, wa pa masayri kung unsa ang resulta sa imbestigasyon sa kapulisan sa maong krimen. (Alger Dura)