Lalaki gipusil, naospital

MITUGPA sa balay tambalanan ang usa ka lalaki kinsa naglingkod lang sa giparking niyang sakyanan sa mga wala mailhing suspek didto sa dalang Wilfredo Aquino sa Agdao ning siyudad sa Dabaw niadtong Biyernes sa hapon.

Ang biktima giila nga si Nolito Toronas Luayon, 49, minyo ug molupyo sa Sta. Lucia Brgy. Centro, Agdao ning siyudad.

Base sa inisyal nga imbestigasyon nila PO3 Reste B. Tan ug PO3 Nerio Pepito Deguito sa Sta. Ana Police Station, naglingkod lang matud pa si Luayon sulod sa iyang sakyanan nga Isuzu Sportivo, kolor gray ug dunay plate number LGE-704 nga nagparking sa dalang Wilfredo Aquino haduol sa usa ka bodega sa Agdao Public Market alas 3:20 sa hapon.

Apan sa dihang mopadagan na unta ang biktima sa iyang sakyanan, usa ka lalaki ang kalit nga miduol kaniya ug sa way daghang istorya gipusil siya tumong sa walang bahin sa iyang abaga.

Gihulagway sa mga nakasaksi sa hitabo nga ang suspek nakasul-ob og kalo, nakasinina og puti nga T-shirt, blue short pants ug dunay gitas-on nga 5'5 ug dali kini midagan palayo sa nahitaboan sakay sa naghulat nga XRM nga motorsiklo, kolor pula ug mipasirit og padagan padung sa dalang Leon Garcia.

Sumala sa nakasaksi sa insidente nga si Ambit Selibrado Bernal, 35, minyo, self-employed ug molupyo sa San Roque, Brgy. San Antonio, Agdao nga samtang tua siya sa bodega nakadungog siya og usa ka buto pipila ka metro gikan sa iyang gitindogan.

Nakita niya ang usa ka kolor red nga XRM motorsiklo nga daling gipadagan didto sa Leon Garcia St. human sa insidente kon diin gimaneho sa usa lalaki nga nakasul-ob og T-Shirt nga dunay bulok pula ug puti, dakuon ang panglawas.

Nakuha sa kapulisan ang usa ka bala sa .45 kalibreng armas sa nahitaboan insidente.

Sa pagsulat ning balita, padayon pa gitambalan ang biktima didto sa San Pedro Hospital sa dakbayan sa Dabaw.

Sa kasamtangan, padayon pa ang pag-imbestiga sa kapulisan sa Sta. Ana Police Station kung unsa ang motibo sa pagpusil sa biktima ug kinsa ang mga suspek sa pagpamusil. (Marizz Robilla)