APROBADO na ni Presidente Benigno Aquino ang P3 matag litro sa produktong petrolyo nga subsidiya alang sa mga pampublikong jeep, taxi ug motorela sa tibuok nasud.

Kini ang gipahibalo sa Land Transportation Franchising and Regulatory Board (LTFRB)-Northern Mindanao niadtong Biyernes.

Matud ni LTFRB-Northern Mindanao Director Mandangan P. Darimbang kini aron sa pagtabang sa transport sector nga dili maglisod sa ilang panginahanglanon sa produktong petrolyo hilabina sa sunod-sunod nga pagtaas sa presyo niini.

Apan matud ni Darimbang nga limitado lamang kini nga subsidiya ngadto sa taxi, jeep ug motorela ug walay labot ang bus tungod kay bag-o lamang kini nagpasaka sa ilang plitehan.

Dugang pa ni Darimbang limitado usab kini ngadto lamang sa mga franchise holders sa ilang buhatan ug walay labot kadtong taxi, jeep ug motorela nga wala sa ilang listahan.

Si Darimbang nagkanayon nga magsugod na sila karon ug ila sa mga franchise holders kinsa makakuha og diskwento sa presyo sa lana nga mokabat ngadto sa P1,500. Apan gibutyag niini nga maghulat pa usab sila sa pinal nga direktiba sa kaulohan bahin sa pagpatuman sa maong programa.

Matud sa taho nga magsugod ang pag-apod-apod sa subsidiya sa ikaduhang semana sa Abril pinaagi sa "smart cards" diin maoy gamiton pag-avail sa subsidiya nga ihatag matag adlaw sa tanang buhatan sa Land Bank of the Philippines sa tibuok nasud.

Dinhi sa tibuok rehiyon, gibutyag ni Darimbang nga adunay kapin kon kulang 9,000 ka taxi, jeep ug motorela ang adunay certificate of public convenience o franchise holders.

Gisulayan pakighinabi sa Sun.Star SuperBalita si Sonny Hinosolango, ang secretary general sa Solidarity of Transport Alliance sa Northern Mindanao (Starex-Piston) alang sa iyang reaksyon apan wala kini ma-kontak hangtud ning pagbalita. (Loui S. Maliza)