NAKAPANGAYO pa og tabang apan nakabsan gihapon sa kinabuhi ang usa ka sekyu human giluba kagahapon mga alas 3:00 sa kadlawon atol sa duty niini sa usa ka dakong establismento sa JR. Borja-Mortola St. ning siyudad sa Cagayan de Oro.

Giila ang biktima nga mao si Juberth Frasco, 28, ulitawo, residente sa Mambato, Agora, Lapasan ning siyudad.

Sekyu sa Ororama Supercenter sa Cogon ang biktima ug sakop sa Emmanuel Plus Security Agency.

Nasayran gikan sa kauban niini nga nag-inusara og roving ang biktima niadtong tungora libot sa establismento apan nakurat na lamang sila dihang gihuptan na niini ang dughan nga bahin ug napuno na sa dugo ang uniporme niini.

Igo lamang kining nakasulti og tabang apan maglisod na usab kini sa pagsaysay sa nahitabo kaniya hinungdan nga gidala na lamang ang biktima sa Northern Mindanao Medical Center (NMMC) ug nasutang duha ka samad ang naangkon niini, usa sa dughan ug sa ilok nga bahin.

Pipila ka minuto ang nilabay sulod sa emergency room, nakabsan sa iyang kinabuhi ang biktima.

Nagtuo ang kapolisan sa Police Station 2 (PS2) sa Cogon nga gipareglahan ang biktima ug posibleng hinimoan sa duha ka tawo tungod kay wala man gyod makasukol ang biktima.

Gikataho usab nga walay dalang armas ang biktima gawas sa batuta.

Aduna usab anggulo nga posibleng agaw armas ang motibo sa mga suspek ug dihang walay nakitang armas ug misuway sab sa pagsukol ang biktima giluba na lang kini sa mga suspetsado.

Responsibilidad usab sa ahensya niini ang mga pinansyal nga gastuhon sa biktima labina natigayon ang insidente atol pa duty niini.

Sa pagsulat ning balita, nagpabilin pa sa morgue sa NMMC ang patayng lawas sa biktima nga gikatakdang kuhaon sa Bollozos funeral parlor.

Matud sa pipila ka mga sekyu sa NMMC nga nahinabi sa Sun.Star SuperBalita nga kung panahon sa roving kinahanglan dili gayud mag-inusara ug kinahanglan aduna gyod kauban aron kung adunay mga insidente susama niini adunay kauban nga makasuporta. (Stephanie V. Berganio)