KINING panahon sa bakasyon, giisip ni sa uban nga tinggawas sa kuwarta. Ngano man?

Tungod kay sa daghan mobiyahe aron mobakasyon. Kong di man gani mobyahe og layo, kalas gihapon sa kuwarta sa siging lakwatsa. Sa mga adunahan wa ni problema. Apan kadtong igo igo ra ang pagka butang, ayaw nalang paluma-luma kay basin mabulit ka sa utang.

Ang akong higala, mao ni naproblemahan. Kay sa niaging summer nagpalabi siya sa iyang gibati kuyog sa iyang pamilya. Gikan sa Boracay nilahos pa gyud sila og Hong Kong.

Resulta hangtod karon wa pa gyud kabawi kay ang duha ka credit card nga ilang gibawon hilabihang puno-a sa utang.

MANGUWARTA

Imbes magbakasyon asa’y maayo og mopadayon lang ta pagpangita og sapi. Segurado ko nga naay daghan nga makuwartahan diha sa imong palibot, apan wa lang nimo hatagi og panahon sa pagduki duki. Mga ginikanan mosugot ka ba nga magsigi lang og laag ang imong anak ning panahon sa bakasyon? O, gusto nimong may masapian sab sila?

Akong tambag pakigkitai si Mr. Fidel Magno sa Department of Manpowqer Development and Placement nga naa mahimutang sa second floor sa Ramos Public Market sa Cebu City. Tuay daghang trabaho nga nagpaabot sa mga kugihan. Apan kong ikaw tapolan mura’g way gana si Fidel nimo. Ayaw nalang og adto.

RABIES

Nakasuway namo og gukod og iro o kamo’y gigukod sa iro?  Kanang ikaw ang gukdon sa iro mao na’y delikado, labi na kong ang iro nagtumpi na ang rabies. Ang Humane Society International inabagan sa buhatan ni Dr. Alice Utlang ang atong Cebu City Veterenarian padayon karon sa ilang kampanya batok sa rabies. Busa ayaw pagpasagad, palihug ayaw pagpataka og buhi sa imong iro. Kung wa na kay panahon sa pagpakaon, ayaw buhii. Tawga ang taga city pound og isurender.

Matod ni Dr. Jessica Maribujoc sa Cbeu City pound, ilang gihingusgan karon ang kampanya batok sa rabies, maoy hinungdan nga nagdasig sab sila sa mga nagbuhi og iro unta makahunahuna mo sa pagpakapon lalaki nga iro o pagpalayget sa babaye nga iro, aron mapugngan ang ilang pagsanay. Sa ingon niini nga paagi, mominos sab ang problema sa rabies.