KAMAGUWANGANG anak nila ni Robin ug Liza si Gina. Ning mao nga mga kaso, si Robin giakusahan sa iyang anak nga iyang gilugos sa makadaghang mga higayon.

Ang una nahitabo niadtong Mayo, 1987, dihang siya 10-anyos pa, sud sa ilang giabangan nga balay. Nagsugod ni dihang nahiuli ang iyang amahan gikan sa Saudi Arabia diin kini nagtrabaho.

Gibitad siya sa iyang amahan, gihuboan sa tanang mga sapot ug giangkon ang iyang pagkababaye ingon sa wa gyud mobati nga iyang anak ang biktima.

Wa gyud siya mosulti sa iyang kasinatian kay nahadlok siya sa ilang amahan kay kanunay siyang nakakita nga gidapatan ang ilang inahan. Makadaghan kini mahitabo, matag higayon nga wa ang iyang inahan ug mga igsuon sa balay.

Nahitabo pa gyud kini gikan sa Enero 1988 ngadto sa Pebrero 1989. Sa gihapon, wa gyuy kaisog nga nisulti si Gina sa kabangis nga iyang nahiaguman sa mga kamot sa iyang amahan.

Paghiuli sa iyang amahan niadtong Septiyembre 1990, gilugos na sab siya niini. Wa gyud siya makaako sa pagsulti kay bisan bangis ang ilang amahan, nakahibawo siyang nahigugma og maayo niini ang ilang inahan. Gikan sa 1990 ngadto sa 1995, gipahimudsan siya sa akusado.

Niadtong 1996, nananghid siya sa iyang inahan nga mobakasyon sa dapit sa iyang iyaan. Nakauyab siya sa mao nga dapit ug nidumili na siya sa pag-uli human masayod nga taliabot na ang iyang amahan.

Nasuko og maayo ang iyang inahan ug gisukot siya unsay problema. Didto nitug-na na siya nga sukad sa 10-anyos pa siya, gilugos na siya sa iyang amahan.

Pwerteng pangulipas ni Robin. Matod niya nga imposible kini niyang mahimo kay ni-abroad gani siya aron dunay maayong kaugmaon ang iyang mga anak. Di sab kini niya mahimo ngadto kang Gina kay sa tanan niyang mga anak, mao kini ang labi niyang pinangga.

Iyang gitug-an nga makausa iyang nasakpan iyang asawa nga nagsige pag-communicate sa iyang ig-agaw nga pari nga iyang ka relasyon kaniadto. Hinungdan nga nagkaaway sila. Usa sab sa iyang gipatugbaw nga rason mao ang pagtabon sa iyang asawa sa nawawi-wari nilang kuwarta nga iyang hinaguan sa abroad.

Motuo ka ba nga way amahan nga nanginabuhi sa gawas alang sa iyang pamilya nga makaako pagguba niini? Katuohan ba ang mga alibi ni Robin? Kon ikaw ang pahukmon, sad-an ba siya sa kasong rape?

Kasong robbery with homicide

Gi-dismiss ang kaso. Una, nalapas ang procedure sa pag-ila sa akusado. Dihang gipa-identify ang asawa, usa lang ka hulagway ang gipakita, ang iya ra sa akusado. Wa siya makaila sa mga tulisan gani. Mubo ra kaayo ang higayon nga nagkaatubang sila ug sa kuyaw pa gyud nga sitwasyon. Lisod sab siyang maka-focus sa mga suspek kay tulo kini ka buok. Unya, milanat pa og pipila ka mga buwan una pa niya natudlo ang akusado nga maoy nipatay sa iyang bana. Nailhan pa kini niya pinaagi sa laing tawo nga nisulti kaniya.

Nakita sa korte nga mas bug-at ang alibi, busa gi-dismiss ang kaso sa korte ug gipabuhian ang akusado.