NAUWAW nga nasakpan nga mangawat, usa ka menor de edad nagdunggab sa iyang kaugalingon sud mismo sa balay nga iya untang kawatan.
Ang maong insidente nahitabo sa Sitio Tigib, Barangay Malubog, siyudad sa Sugbo, pasado alas 4:00 niadtong Sabado sa hapon.
Samdan sa iyang liog mao si “Jerry” (tinuod ngan gipungan), 16, nagpuyo sa nahisgotang dapit.
Sa taho nga nasayran gikan kang SPO4 Alex Dacua sa Homicide Section nagbutyag nga ang tag-iya sa balay nga si Lucresia Borres nakamatikod nga may tawo nga nisulod sa ilang balay.
Sa iyang pagsusi, nakita niya nga may mitago dapit sa ilang abohan hinungdan nga nisinggit kini og tabang sa mga silingan hangtud nga naabot si “Jerome”, maguwang sa biktima.
Sa pagpangita na ni Jerome sa tawo nga nisulod sa balay ni Borres, iyang nadiskubrehan ang iyang manghud nga nitago sa abohan.
“Sus si Jeffrey ra man diay ni ang mitago,” singgit sa maguwang ngadto sa mga silingan nga nitabang sa pagpangita sa tawo nga nitago.
Human madiskubrehe ang biktima, nigawas kini sa abohan nga iyang gitagoan, nisaka kini sa taas sa balay ni Borres ug didto nagdunggab sa iyang liog.
Nadiskubrehan ra usab dayon ni sa igsuon nga nisunod kaniya sa taas ug maoy nagdala sa biktima sa tambalanan.
Human matambali ang biktima sa mga dokor, gitugotan ra usab kini nga makapauli sa ilang panimalay.