PATAY ang walo ka mga tawo ug daghan ang naangol sa nahitabong duha ka managlahing pagdahili sa yuta didto sa probinsiya sa South Cotabato.

Sa pakighinabi sa Bombo Radyo ngadto kang Tampakan Vice-Mayor Relly Leysa, ang unang landslide nahitabo didto sa Barangay Pulabato, Tampakan, kon diin upat ka mga tawo ang hikabsan sa kinabuhi.

Nailhan ang mga napatay nga sila Daniel Pandoy, Jerry Mamowalat, Kinram Bayore ug Remy Daway, samtang ang naluwas mao sila Pajel Doc ug Tintin Malid.

Nasayran nga mga biktima nahunlakan sa midahili nga yuta sa maong dapit.

Samtang ang ikaduhang pagdahili sa yuta nahitabo didto sa munisipyo sa T'boli kon diin upat ka mga tawo ang namatay ug duha sab ang naluwas.

Mga biktima giingong atua sa ilawom sa tunnel sa dihang nahitabo ang insidente.

Giila ang mga napatay nga sila Christopher Lagumbay, Roben Castor, Otero Militon ug Randy Asistido samtang ang naluwas mao sila Macmac Kamagong ug Oliver Canson.

Ang duha ka landslide sa South Cotabato resulta sa padayon nga pagbundak sa ulan.

Milihok na si South Cotabato Governor Authur Pinggoy aron matabangan ang mga biktima sa landslide ug baha. (Edgardo Fuerzas)