DUHA ka mga lalaki midangat sa tambalanan aron magpatambal sa ilang mga samad nga naangkon dihang gipusil sila sa ilang silingan niadtong Dominggo.

Ang insidente nahitabo alas 8:45 sa gabii didto sa Purok 1, Barangay Biao Joaquin, distrito sa Calinan, siyudad sa Davao.

Ang blotter sa Southern Philippines Medical Center (SPMC) nag-ila sa mga biktima

nga mao sila Geracleos Tumampos, 28, ulitawo ug Renaldo Felimon, 32, nagpuyo sa Purok 1, Barangay Biao Joaquin.

Si Tumampos nakaangkon og samad sa iyang tiyan ug tuong bukton samtang si Felimon nakaangkon og samad sa iyang wala ug tuong tiil human sila gipusil sa ilang silingan nga si Leonilo Ambuat, 34.

Base sa blotter sa Calinan Police Station, ang suspetsado gikataho nga dunay kanhi bikil ngadto sa biktima mao nga dihang nagkatagbo ang ilang mga dalan, nahitabo ang pagpamusil gamit ang .357 kalibre nga rebolber.

Samtang gidala ang mga biktima sa tambalanan, suma sa report, daling mitahan sa

iyang kaugalingon ang suspek ngadto kang Barangay Kapitan Pedrito Cañedo.

Gitunol sa suspek ang iyang armas nga dunay special nga bala sa 357 caliber revolver ug duha ka mga buhing bala sa .38 caliver revolver.

Si Ambuat gitunol dayon ni kapitan Cañedo ngadto sa Calinan Police Station alang sa dugang imbestigasyon sa maong krimen.

Sa pagsuwat ning balita, gikatahong giandam na ang pagpasaka og kasong frustrated murder batok suspek kinsa atua nabilanggo sa selda sa kapulisan sa Calinan. (Alger Dura)