GIKALIPAY sa mga katiguwangan sa Barangay Tagabebe, Governor Generoso, Davao Oriental ang maayong balita nga gipaabot kanila sa Department of Social Welfare and Development (DSWD) dinhi sa rehiyon.
Sa nakalabay nga semana, personal nga giyagyag ni DSWD-Davao Assistant Director Priscilla Razon ang balita atubangan sa mga molupyo sa lugar nga mitambong sa launching sa laing programa sa DSWD didto.
Sumala pa nga sa dili madugay, mga katiguwang sa dapit nga nag-edad og 77 anyos pataas makadawat og pinansiyal nga ayuda gikan sa ahensiya, subay sa programang social pension nila.
"Akoa sab nga ipaabot diha ninyo nga sa dili madugay pipila na sab ka mga lolo ug lola nato dinhi ang makadawat og financial assistance sa atong social pension program, nga makatabang sa ilang panginahanglanon sa matag adlaw," ni Razon atol sa lauching sa sub-fish project sa maong barangay, sa nakalabayng semana.
Nasayran nga gibana-banang 7,590 ka mga pobreng senior citizens sa Davao Region ang makabenepisyo niini.
Ang social pension nahiunod sa Republic Act 9994, o "Expanded Senior Citizens Act of 2010."
Ang mga senior citizens makadawat og tag P500 matag bulan, dakong alibyo na sa ilang panginahanglanon.
"Modawat ang beneficiary sa social pension og P500 kada bulan pero madawat nila kini quarterly," pasabot ni Razon.
Ang maong ihap maoy target nga indigent senior citizen nga posibleng mahatagan
sa maong ayuda.
Gisugdan na kini Enero ning kasamtangang tuig, diin ang Social Pension for Indigent Senior Citizens program paluyuhan sa DSWD.
Dugang pa nga ang ahensiya mialokar og P871 million alang sa programa.
Ang DSWD milibot na sab sa nagkadaiyang bahin dinhi sa Mindanao aron ipasabot ngadto sa mga senior citizens kun unsa ang katikaran sa maong programa.
Pinaagi sab sa DSWD National Household Targeting System for Poverty Reduction
(NHTS-PR), masayod ang ahensiya sa kinsa kadtong senior citizen nga nag-edad og 77 anyos pataas ang haum sa criteria, makadawat og hinabang.
Ang kwalipikado nga makadawat mao kadtong masakiton, nagluya na, dunay kakulian sa lawas, walay ginadawat nga pension o permanente nga kinitaan o suporta gikan
sa banay alang sa iyang nag-una nga panginahanglan.
Samtang dili kwalipikado sa programa kadtong nagdawatan og pension gikan sa GSIS, SSS o AFPMBAI uban pang private insurance company, dunay permanente nga kinitaan, may regular nga suporta gikan sa pamilya.
Sa kasamtangan, ang DSWD padayon sa pag-validate sa mga indibidwal nga mamahimong mabutang o mapailawom sa programa.
Dugang pagpasabot sa ahensiya nga kun ang usa ka senior citizens wala maapil sa (NHTS-PR) data, mamahimo siya nga maka-apply sa Office of the Senior Citizen Affairs (OSCA) sa ilang dapit.
Subay sa datus ang Bicol, Western Visayas, ug Central Visayas ang dunay pinaka-daghan og ihap sa mga pobreng senior citizens, samtang sa Davao Region pipila lamang.
Dinhi sa rehiyon, subay sa NHTS-PR 2010 data ang Davao del Sur dunay pinaka-taas nga potential social pensioners nga nag-edad og 77 anyos, pataas nga miabot ngadto sa 745 (first district) ug 1,457 (second district).
Ang Davao Oriental sab may 512 (first district) ug 938 (second district). Didto sa Comval, may 657 nga natala nga 657 (first district) ug 948 (second district).
Sa Davao del Norte sab, nakatala og 865 (first district) ug 920 (second district).
Dinhi sa siyudad sa Davao, nakatala sab og 548 nga posibleng mapailawom sa programa.
Ang pagpanghatag sa social pension sugdan karong bulan sa Hunyo. (Rhona Goc-ong)