TUNGOD sa nahitabong kalamidad sa nasud sa Japan, semana na ang nakalabay, giangkon sa usa ka opisyal sa Department of Trade and Industry (DTI) nga may namatikdang pagsaka sa presyo sa mga raw materials ilabi na sa electronics dinhi sa nasud.

Pahayag ni DTI Secretary Gregory Domingo nga subay sa ilang monitoring ang nahitabong kalamidad sa Japan, nakahatag og dakong impact sa electornic industry sa nasud, hilabi na nga dunay mga planta dinhi sa Pilipinas nga ang mga ginagamit nga materyales gikan sa maong nasud.

Dugang sa DTI secretary nga 60 porsyento sa total exports sa nasud ang raw material niini gikan sa Japan.

Kahinumduman nga human gitay-og sa grabeng kalamidad ang maong nasud, daghang sektor ang nabalaka tungod sa mamahimong epekto niini sa nagkadaiyang matang sa negusyo.

Pasabot ni Domingo nga tungod daghang planta didto sa Japan ang nanira human makasinati og kadaut dala sa kalamidad, rason nga misaka sab ang presyo sa mga raw materials sa electronics.

Ni Domingo nga kun magpadayon o madugayan ang pagbalik sa normal nga operasyon sa mga planta didto, posible sab nga dugay'ng pag-antus pa ang masinati sa mga tawo nga anaa sa electronics sector.

Usa sab sa gikabalak-an mao nga ang nahitabong kalamidad makahatag og suliran sa sektor sa saging nga nag-unang produkto nga gina-export didto.

Pahayag ni Domingo, naningkamot ang ilang ahensiya nga masolusyunan ang maong suliran kun kini man mohatag og dakong problema sa maong sektor sa patigayon. (Rhona Goc-ong)